• اكتب معانا
  • ماتنسناش
  • تابعنا
الموضوع اللي جاي
إنتاج أول علبة تونة مصرية 100% اسمها "سمر مون"
الموضوع اللي فات
السعودية والإمارات هيقدموا مساعدات لليمن بـ 500 مليون دولار

10 حاجات متفوتهاش في أسبوع الصورة في وسط البلد

كلنا كده عايزين صورة
denis dailleux

لو انت مصور أو بتحب التصوير ممكن تكون سمعت عن "فوتوتوبيا"، المكان اللي بيجمع المصورين بورش وفعاليات تنمي موهبتهم، وبينظموا بالتعاون مع الإسماعيلية جروب في وسط البلد أسبوع الصورة لأول مرة في مصر، الأسبوع ده هيكون فيه فاعليات مختلفة، محاضرات وورش وصور ومعارض، لو عايز تحضره كله بـ850 جنيه، أو تختار يوم بـ150 جنيه، واحنا عشان نسهل عليك جمعنالك أهم الحاجات اللي مفروض تحضرها.

هبة خميس

هبة خميس المصورة المصرية اللي سافرت الكاميرون وعملت قصة عن كي أثداء السيدات وفازت بالجائزة الأولى في مسابقة "world press photo" كأول مصرية تفوز بيها، هبة هتتكلم عن التحول من الأخبار للتوثيق. 

يوم الجمعة 23 نوفمبر الساعة 2 الضهر في ممر كوداك.

 

 توفيق آرمان

وهو عنده 11 سنة مسك "توفيق" أول كاميرا في حياته ودي كانت البداية عشان يكون واحد من أشهر المصورين العرب، المصور المصري اللبناني عنده "ستديو آرمان" اللي ممكن تكون شفت صوره بس متعرفش مين مصورها.

يوم الجمعة 23 نوفمبر الساعة 7 مساءًا في مبنى تمارا. 

 Denis Dailleux

شفت الصور المشهورة لأبطال كمال الأجسام مع أمهاتهم، دي اللي صورها دينيس المصور الفرنسي واللي هيكون موجود عشان يدي محاضرة في "أسبوع الصورة" عنوانها "من مصر إلى غانا".

يوم السبت الساعة 8 مساءًا في ممر كوداك.

Portfolio review 

لو انت مصور محترف فدي حاجة مهمة ليك، أو حتى لو بتفكر تبقى محترم، عدد من المصورين المحترفين هيقيموا شغلك بشكل علمي وهيقولولك ايه صح وإيه غلط ومفروض تعمل ايه؟ الموضوع ده هيكون يوم السبت وبيضم عدد مختلف من المحاضرين انت بتختار مين فيهم يقيم شغلك.

هالة القوصي وعبدالسلام موسى

هالة هي مخرجة فيلم "زهرة الصبار" وعبدالسلام موسى مدير تصوير أفراح القبة وموجة حارة اللي هما من أفضل الاضاءات والتصوير في تاريخ الدراما، ده غير أعمال تانية كتير، الاتنين هيقدموا محاضرة عن فيلم زهرة الصبار وازاي الفن اتحول لفيلم روائي طويل.

يوم الحد الساعة 8 مساءًا في ممر كوداك.

أحمد المرسي

شفت الفيل الأزرق؟ شفت تراب الماس؟ التصوير والألوان العظيمة دي كلها بسبب مدير التصوير أحمد المرسي، اللي هيتكلم عن القصص السينمائية.

يوم التلات الساعة 9 في مبنى تمارا.

 علي علي

أشهر مخرج إعلانات في مصر، يمكن المصريين مش حافظين مين مخرج إعلانات غيره، علي علي هيتكلم عن 20 مشهد علموه كل شئ هو اتعلمه، احنا شخصيًا منتظرين نعرف ايه اللي علم علي علي اللي بيعلمنا كلنا.

يوم الأربعاء الساعة 9 في مبنى  تمارا

تصوير الشارع 

التصوير في الشارع دايمًا مقلق وعشان كده ده ليه محاضرة مخصوصة في أسبوع الصورة، عشان تعرف ازاي تصور في الشارع من غير قلق.

علي زرعي وأحمد جابر يوم الأثنين الساعة 2 في ممر كوداك.

مصطفى درويش 

لو بتحب التوثيق، فمصطفى درويش من أشهر الصحفيين اللي بيصوروا قصص فيديو وهيتكلم عن صحافة الفيديو.

يوم الخميس الساعة 8 مساءًا في ممر كوداك.

 أبو بكر شوقي

مخرج فيلم "يوم الدين" اللي شارك في "كان" هيكون موجود في أسبوع الصورة عشان يتكلم عن ازاي تلاقي اللي بتحبه وتلاقي شغفك.

يوم الجمعة الساعة 6 في ممر كوداك.

لو عايز تشوف البرنامج كله من هنا، ولو عايز تشتري التذاكر من هنا. 

الصورة الرئيسية من تصوير: Denis Dailleux

Home
خروجات النهاردة
Home
Home