• اكتب معانا
  • ماتنسناش
  • تابعنا
الموضوع اللي جاي
"شورتات الأوسكار" برنامج بيعرض الأفلام القصيرة في السينما لأول مرة
الموضوع اللي فات
الأردن أول دولة عربية تستضيف مسابقة أقوى رجل في العالم

دليلك لأفضل بيرة لازم تجربها في الوطن العربي

كاسك نديمك

ليل/ خارجي، على سطح فندق من فنادق وسط البلد القديمة، قاعد بيراقب الشوارع والسما ويبص لحبيبته اللي عمرها ما خذلته، عمره ما احتاجها ومالقهاش، هي الصديقة وقت ما الكل يقول نفسي، واللي تقدر ترميلها همومك من غير ما تضايق ولا تمل، إزازة البيرة اللي بتشربها، كان بيشربها قبلك ويمكن في نفس المكان مهندس مصري عبقري صمم الهرم الأكبر من 7000 سنة. البيرة أقدم صديق للإنسان، وحاليًا في المرتبة التالتة بعد المياه والشاي في الاستهلاك كأكثر مشروبات بيستهلكها الإنسان في العالم. جبنالك قائمة بأكثر البيرات شعبية في الوطن العربي، علشان تعرف منين ما تسافر هتلاقي صاحبتك فين.

العراق


بلد البيرة الأم، اللي انتشرت منها البيرة لكل العالم من أكتر من 7000 سنة، لإن أقدم دليل على وجود البيرة كان في الحضارة السومرية اللي في العراق من 5000 سنة قبل الميلاد واتسمت "سيكارو" يعني "الخبز السائل"، في نفس الوقت اللي انتشرت فيه عند قدماء المصريين في مصر، وانتشرت منهم للعالم. العراق كان عنده كذا نوع بيرة المميز فيهم هي أساميهم، اللي كلهم على أسماء بنات، سنابل وشهرزاد وفريدة ولؤلؤة، لكن الأكثر شعبية فيهم هي "فريدة" اللي ابتدت سنة 1956 في بغداد، وانتشرت إعلاناتها في الجرايد، وبقت المشروب الشعبي، لحد الاحتلال الأمريكي للعراق سنة 2003، اللي خلى مستوى الشركة يتراجع، لحد ما اتشطبت من البورصة العراقية في 2012.

الحواديت بتقول إنها اتسمت بالاسم ده على اسم الملكة فريدة؛ المدير المفوض للشركة الشرقية كان مهووس بالملك فاروق والعائلة المالكة، ورغم إنهم سابوا العرش في مصر لكنه قرر يسمي المنتج على اسم الأميرة صافيناز ذو الفقار، اللي أُطلق عليها الملكة فريدة بعد جوازها من الملك فاروق. موقع "Ratebeer" عمل التقييم الأعلى لبيرة "سنابل"، وفي المركز التاني "فريدة"، فكده تقدر تجرب "سنابل" لما تروح العراق". تقدر تشوف التقييم كامل من هنا.

مصر


في أنواع كتير من البيرة في مصر، بس كله كوم وست الكل كوم تاني. ستيلا موجودة في مصر من سنة 1897، وكان بيعملها مصنعين واحد في القاهرة والتاني في إسكندرية، والاتنين مختلفين في الطعم لكن بنفس الاسم، وكانت من الشركات اللي جمال عبد الناصر أممها سنة 1963. الفكرة مش في كده، الفكرة في الارتباط الشعبي بيها، والإعلانات اللي كانت بتبقى في الجرايد والشوارع، وإنها نديم الناس في الأفراح والاحتفالات، وحتى في الموالد.

تاريخ البيرة في مصر بيرجع لقدماء المصريين، اللي كانوا بيهتموا جدًا بيها وكان بيشربها الكبار والصغيرين، واتسمت "هاكت"، من كتر ما كانوا بيحبوها اتفننوا في طرق عملها وتبريدها. لكن على الرغم من شعبية ستيلا، موقع ""Ratebeer" مدي أعلى تقييم لبيرة "سقارة" اللي بتنتجها نفس شركة "ستيلا"، لكنها أعلى منها في تركيز الكحول. تقدر تشوف التقييم من هنا

لبنان


أول علامة تجارية لبيرة محلية أنتجتها لبنان، بيرجع تاريخها لسنة 1933، بيرة "ألمازة/الماسة" كانت هي البيرة اللبنانية الوحيدة لحد سنة 2006 لما طلعت بيرة "961" تحت القصف الإسرائيلي لجنوب لبنان. البيرة الجديدة بقت بتنافس "ألمازة" بالتدريج على عرش أفضل بيرة لبناني اللي احتلته لسنين طويلة، وكمان بعد ما اشترتها شركة "Heineken"، بقت "961" هي أفضل نوع بيرة شركتها الأم مملوكة لشخص لبناني الجنسية.

ألمازة في منها بتركيز 4٪، وبتركيز 6٪، أما "961" عندهم هوس بالنكهة اللبنانية مش بس بالبيرة في حد ذاتها، بيصنعوها بتركيز 6.3 وعاملين منها أنواع مختلفة بتركيزات مختلفة للكحول. الجميل بقى إن بحسب موقع "Ratebeer"، فأفضل بيرة في لبنان بناءً على تقييم متذوقي البيرة حوالين العالم، هي بيرة "Colonel"، متفوقة على أشهر بيرتين هناك. في كل الأحوال ما ينفعش تروح لبنان من غير ما تحلى لياليك ب "ألمازة" و "961" و"كولونيول"، ليالي بيروت والجبل هتحلى معاها.
تقدر تشوف التقييم كامل من هنا

الأردن


تعتبر بيرة "البترا" اللي شايلة اسم المدينة الأثرية الأردنية "البتراء"، واللي منحوتة في الجبل. البيرة المحلية الأكثر شعبية في الأردن، ما يتفوقش عليها في الشعبية غير "أمستيل" الهولندية، يمكن علشان كانت أول مصنع بيرة يتعمل في الأردن سنة 1956، لكن "البترا" اتصنفت سنة 2013 كخامس أفضل بيرة في الشرق الأوسط في التقرير اللي نشرته CNN وقتها، وبتنزل بتركيزين واحد 8٪ والتاني 10٪.

موقع "Ratebeer" بيدي الأفضلية لبيرة "Carakale Blonde Ale" اللي اتأسس المصنع بتاعها في الأردن سنة 2012، وتعتبر أول مصنع "Microbrewery" في الأردن، الموقع بيدي الأفضلية بشكل محايد للطعم. تقدر تشوف التقييم من هنا

فلسطين


المنطقة العربية عمومًا من أوائل المناطق اللي ظهرت فيها البيرة، لكن البيرة بشكل التصنيع الحديث دخلت فلسطين بعد اتفاقية أوسلو، واتفتح أول مصنع للبيرة في مدينة طيبة اللي على بعد 35 كيلو من القدس عاصمة فلسطين سنة 1994، وبينتج منها 5 أنواع، وفي 2007 ابتدوا ينتجوا بيرة من غير كحول علشان المجتمع الرافض للكحول.

البيرة الفلسطينية "طيبة" اتفوقت على البيرة الإسرائيلية "جولد ستار" في التصنيف اللي عملته ال CNN سنة 2013، ومن 2005 وبلدة طيبة بستضيف مهرجان سنوي في أول شهر أكتوبر من كل سنة شبه "أكتوبر فيست"، اللي بيتعمل في ميونخ في ألمانيا في نفس الشهر من كل سنة. وبرضه في تقييم موقع "Ratebeer" احتلت برضه المركز الأول كأفضل طعم، تقدر تشوف التقرير كامل من هنا


المغرب

على الرغم من إن أعلى بيرة استهلاك وبيع في المغرب هي البيرة الهولندية "Heineken" لكن البيرة المغربية "كازبلانكا" هي أكتر بيرة محلية ليها شعبية في المغرب وبتتصنف من أفضل أنواع البيرة في الوطن العربي، وشهرتها عدت المغرب لإنها بتتقدم في "عالم والت ديزني" اللي في ولاية فلوريدا في الولايات المتحدة الأمريكية، وحوالي 37 - 40٪ من إنتاجها بيتصدر خارج المغرب.

الشركة اللي بتنتج البيرة اسمها "براسري المغرب" واللي دخلتها فرنسا المغرب سنة 1919، لكن أول إزازة كازابلانكا كانت سنة 1996. البيرة صاحبة التقييم الأعلى في موقع "Ratebeer" هي "Flag Speciale" وبيليها علطول "كازابلانكا"، تقدر تشوف التقرير كامل من هنا


تونس

بعد الثورة على "بن علي" في 2011 ووصول الإسلاميين للحكم، كان المتوقع إن معدل استهلاك البيرة والكحول يقل في تونس بعد ما عمل رقم قياسي. تونس الخامسة على العالم في استهلاك الكحول، مقارنة بعدد السكان. لكن الاستهلاك زاد بنسبة 20٪. البيرة التونسية الأكثر شعبية هي الجميلة "سلتيا"، التوانسة بيحبوها جدًا رغم محاولات الشركات الأجنبية إنها تستحوذ على الذوق التونسي، علشان كده السوق التونسي للبيرة ممتع جدًا.

الشركة الهولندية "Heineken" حاولت تنزل مشروب جديد في السوق التونسية وهم متوقعين إنه هيكتسح السوق، عملوا كل حاجة، سموا البيرة "بربر" وده الاسم الشعبي "الكوميدي" للبيرة في تونس، ونزلوها بسعر رخيص بالمقارنة ب "سلتيا"، التوانسة أول كام أسبوع اشتروها بكميات ضخمة علشان يجربوها لكنهم رجعوا بعدها علطول لمشروبهم المفضل "سلتيا"

تقدر تشوف تقييم موقع "Ratebeer" من هنا

Home
خروجات النهاردة
Home
Home