"الزمن الجميل"، دي الكلمة اللي بنقولها دايمًا على الزمن اللي فات، ولما بنشوف صور عمارات وسط البلد ولا جروبي، بنفتكر قد إيه الزمن ده كان حلو، بتحلم البنات بفستاينها الحلوة وهي معاها شاب في حلاوة عمر الشريف، بيقولها اتفضلي يا مودمزيل، ويمشوا في شوارع القاهرة الخديوية وينتهي اليوم بمزيكا وبوسة على الإيد، وعشان وسط البلد ليها طبع رومانسي خاص، ده دليلك لو عايز تقضي فيها يوم..

عيش وملح، لو بتدور على مكان تفطر فيه وأنت شايف نور الشمس داخل من الإزاز، يبقى هو ده مكانك، فيه ناس بتقول إن الفطار فيه هو الأفضل في وسط البلد، لكن كمان فيه غدا وعشا حلوين، ولو روحت هناك ماتنساش تشرب شاي بالمريمية اللي تقريبًا مش موجود في القاهرة، ازايز البيبسي الإزاز والمنتجات الموسمية والفاكهة اللي مش موجودة في مكان تاني، بتدي المطعم ده طابع خاص، ولو دورت كده هتلاقيهم بيعملوا عروض أفلام ومزيكا هتخلي يومك مختلف معاهم.

لما تفتح باب عيش وملح عشان تروح، هتلاقي قدامه ABnG Egypt، وده كنز من الاكسسورات اليدوية والمفروشات اللي مش هتلاقي زيها في حتة تاني، ممكن تستغل الموضوع وتشتري هدية لعيد الحب من هناك وهتكون مختلفة. الزقاق أو الممر اللي بيقع فيه عيش وملح وABnG بيتقال عليه ممر كوداك، وتم تجديده قريب من الإسماعيلية للعقارات، وبمجرد ما تمشي فيه خطوتين، هتحس إنك رجعت لأيام الزمن الجميل.

العنوان: ممر كوداك 20 شارع عدلي، قدام المعبد اليهودي.

 لو سهرة وعايز تقضيها على أنغام مزيكا حلوة وتأكل وتشرب، يبقى Le bistro  هو المكان اللي المفروض تزوره، من سنتين القدر خلاني أدخله صدفة، ودقت أحلى أكل في حياتي والجرسون اللي بيتكلم فرنساوي حسسني إني سافرت باريس، لو عايز تخرج في Date رومانسي هيكون ده مكان مناسب ليك.

العنوان: على ناصية هدى شعراوي.

جروبي هو العلامة المميزة لوسط البلد في الزمن الجميل، ولو كان فرع طلعت حرب قافل، ففرع جنينة جروبي اللي في أول عدلي لسه فاتح، المكان مناسب جدًا لفطار الصبح، خصوصًا إن فيه جنينة وشمس ونور وهوا، وممكن تروح بليل وتدوق الحلويات اللي كانت بتتصدر زمان بره.

لو زهقت من الأماكن وعايز تتمشى، يبقى روح للعبد وهات آيس كريم، أو حلويات شرقية أو حتى بيتزا وأكل ونقنق فيه، وهتتفاجئ إنه حلو، ولو حتى ماطلعش حلو أوي، العبد يتبلعله الزلط! يمكن لأنه بيفكرنا بأيام زمان وبنستحمل زحمته دايمًا، وخد حلوياتك واطلع على الكورنيش عند الهيلتون، اركب فلوجة أو مركب واتبسط ساعة في النيل واغسل قلبك من الهموم قبل ما تروح.

العنوان: جروبي في 14 شارع عدلي أقرب لناحية العتبة، والعبد في 25 شارع طلعت حرب.

الرومانسية مش هي المزيكا والورد والشعر بس، ممكن تبقى رومانسية ثقافية شوية، المتحف المصري في التحرير مدد ساعات عمله لحد 7 بليل، ولو فكرتك عنه واخدها من رحلات المدرسة، صدقني  هو اتغير كتير عن زمان، وهتلاقي فيه رومانسية ماكنتش متوقعها.

ممكن بعد جولتك في المتحف، تروح معرض المشربية اللي فيه عروض لوحات مختلفة ومميزة فعلًا، وتختم اليوم بعشوة في كايروما اللي هيحسسك إنك دخلت إيطاليا، رغم إنك لسّه جوه شوارع القاهرة. ولو بتحب السينما ماينفعش تعدي اليوم الثقافي ده من غير ما تدخل سينما زاوية، اللي بتعرض أفلام غير اللي بتعرض في السوق.

العنوان: سينما زاوية قاعة من ضمن قاعات سينما اوديون في شارع معروف متفرع من طلعت حرب.
المشربية: 8 شارع شاملبيون.

كايروما: 19 يوسف الجندي.

المتحف المصري في ميدان التحرير او 15 شارع ميريت باشا.

الفضة المصري مافيش في جمالها، خصوصًا لو معمولة مخصوص، وأنت ماشي في وسط البلد، هتلاقي محل عاطف واصف، اللي فيه لمسة قديمة مع شكل جديد، أسعار معقولة ومش هتخرب المرتب، ومش هتصدق قد إيه هي مصرية ومعمولة بطريقة مستوحاة من تاريخنا وثقافتنا، ولو الطبيعي والمعتاد إن الرجالة هما اللي بيشتروا الفضة للستات، في عاطف واصف هتلاقي الستات هدايا ماكنتش على بالها تشتريها.

عاطف واصف: 54 شارع عبدالخالق ثروت.