يمكن كلمة "انتحار" الحيوانات دي تكون غريبة شوية، بس أول مرة سمعتها كان من 4 سنين، وقت ما أعلنت حديقة الحيوانات في الجيزة عن انتحار الزرافة "روكا" عن طريق خبط راسها في السور الحديد؛ نتيجة مشاكسات ومضايقات الزوار، ده كان أول تخمين ظهر، وبعدها أعلنت مصادر تانية في الحديقة عن إنها قتلت نفسها بالغلط. مافيش معلومة مؤكدة عن سبب الحادثة، بس الجديد إن  كلمة "انتحار"وقت الحادثة دي كانت بتطرح أسئلة كتير، حيوان بينتحر؟ فيه أسباب معينة بتخليه يوصل للمرحلة دي؟ والسؤال الأهم: هل الحيوانات بتُصاب بالاكتئاب زي ما بيحصل مع البشر؟
 
الإجابة: 
آه، في عالم الحيوانات سواء كانت أليفة أو شرسة، الشعور بالاكتئاب حاجة موجودة وبقوة. في 2012، اتنشر مقال في ناشيونال جيوجرافيك بعنوان "هل الحيوانات بتكتئب؟" والمقال كان حوار مع "Olivier Berton" البروفيسور المساعد لعلم الأعصاب في جامعة بنسلفانيا بعد ما نشر مقال في مجلة Science عن الدراسات الحديثة للقوارض والأسماك اللي كانت بتفتقر للاهتمام في بيئتهم. بيجاوب "Berton" عن السؤال بإنه مايقدرش يُجزم إن الحيوانات بتكتئب، لكن ده بيظهر كعلامات واضحة عليهم، زي فقدان الاهتمام في الأنشطة الممتعة، وفقدان الشهية، وتغيير أنماط النوم، وإزاي بيتفاعلوا اجتماعيًا مع بقية الحيوانات.

"Gernot Wieland" واحد من الـ Speakers في TEDx كان بيحكي عن اكتئاب الحيوانات، ومن ضمن القصص اللي حكاها، قصة زميله في المدرسة اللي كان بياخد كلبه الجيرمن شيبرد معاه في كل مكان، وبعد شهور زميله انتحر بحبوب منومة، والكلب كان له نفس المصير. بيقول كمان إن نسبة الاكتئاب عند الحيوانات المفترسة أقل بكتير من الحيوانات الأليفة وده سببه انهم بيعيشوا على طبيعتهم في البيئة الخاصة بيهم، وإن الحيوانات الأليفة بتُصاب بالاكتئاب معظم الوقت بسبب تغيير البيئة أو الظروف المحيطة وتأثيرها عليها، زي إنها تحس إنها محبوسة في قفص ومُقيدة. 

من ضمن القصص اللي حكاها "Wieland"، إن في واحدة من حدائق الحيوان في العالم، حاول حمار وحشي الهروب منها 7 مرات، وفي كل مرة كان حُراس الحديقة بيمسكوه وبيُصاب بعدها بالإكتئاب لفترة، في المرة التامنة اللي هرب فيها الحمار، وأثناء ما الحراس كانوا بيرجعوه حطوه في عربية وفي طريقهم للحديقة، الحمار الوحشي نط من العربية وهي ماشية، ومات في ساعتها. كل الدكاترة فسرت ده بحالة انتحار نتيجة للاكتئاب.
القصة دي بتخليك تسأل سؤال جديد:

هل الحيوانات بتتعمد الانتحار؟ هل بتختار انها تقتل نفسها؟
بيجاوبنا دكتور محمود حمدي –أخصائي طب وجراحة الحيوان-، إن مفيش حاجة اسمها "انتحار الحيوانات" بالمسمى الحرفي، أو مفيش كلب بيوصل نفسه للانتحار عن عمد، بيحس بالاكتئاب وبالحزن ده أكيد وبتحصل، والحاجات اللي بتحصل نتيجة للاكتئاب هي خارج إرادته. "الحيوانات بتمشي بالغريزة مش بالتفكير، عشان كده لو فيه شريكين قاعدين مع بعض، وبيحصل انفصال أو موت لحد فيهم، بيصاب الشريك التاني باكتئاب شديد جدًا وحزن بيبقى واضح عليهم، ومتجسد في الإضراب عن الأكل، أو أكلة ضعيفة، قلة في الحركة وخمول، شعره يقع.. كلها حالات بتؤدي تدريجيًا لوفاة الحيوان –ده في حالة لو ماتعالجش أو ماستجابش للعلاج-. لكن ده وقتها مابيكُنش تفكير في الانتحار، قد ما هو نتيجة للحزن".

حسب ما ذكر موقع Live Science، إن في نهاية الفيلم الوثائقي "The Cove" اللي فاز بالأوسكار في 2010، بيدّعي مدرب الدلافين "Ric O'Barry" إن حصلت حاجة غريبة معاه وهو إن الدولفين اللي بيدربه نط من المياه وانتحر بين ايدين "O'Barry".
وبيوضح الباحث في جامعة مانشستر Duncan Wilson، إن عدم النشاط الناجم عن الاكتئاب مش هو نفسه الانتحار، رغم انه ممكن يؤدي إلى الوفاة.

الطبيب البيطري أحمد حتاته، بيقولنا إن فيه فروق كبيرة وواضحة بين المشاكل السيكولوجية اللي بتحصل للحيوان والمشاكل الفسيولوجية زي الأمراض العضوية، فـ وقت ما بيبان علامات خمول أو كسل على الحيوان، بيتم تشخصيه مبدأيًا وعمل التحاليل اللازمة للتأكد من إنه عضويًا كويس ومش بيعاني من أي حاجة، ولما بنتأكد إنه تمام، بنبقى عارفين إنه سبب نفسي ورد فعل لحاجة اتعرض لها، "من الحالات اللي عدت عليّا بقرة وعجل كانوا في مزرعة واحدة، بياكلوا وبيشربوا مع بعض، ووقت ما اتباع العجل، البقرة أكلتها قلت واتضح عليها علامات الاكتئاب".

من أكتر الأماكن اللي بيدور حواليها علامات استفهام لما نسمع "اكتئاب الحيوانات" هي حديقة الحيوانات بالجيزة، واللي بتعتبر أقدم حديقة حيوان في أفريقيا. قصص كتير عن محاولات هروب واكتئاب وانتحار الحيوانات لحد سرقتهم منها، وأشهرها قصة النسناس الهارب وانتحار الزرافة روكا، بيجاوبنا "محمد"-حارس في الحديقة-: "الحارس مننا بيبقى عارف إيه ممكن يزّعل الحيوان ويتجنبه، زي إنه يفضل رايح جاي قدام القفص بدون ما يحط له أكل، أو مايهتمش بيه ويلعب معاه زي العادة".

عن قصة محمد الشخصية مع اكتئاب الحيوانات، بيحكيلنا إنه وقت ما كان تعبان، كلبه البلاك جاك كان بيطلع صوت غريب بيشبه بالنواح، ووقت ما قرر "محمد" السفر للسعودية، كلبه دخل في مرحلة اكتئاب وأضرب عن الأكل، واضطر أخوه يروح بيه لدكتور، واللي بدوره قاله: "لو صاحبه مش موجود، يبقى انسى إنه يرجع كويس"، وفعلًا أيام وتوفى الكلب بسبب الزعل على صاحبه.

"محمود" -حارس في الحديقة- بيقول إن أغلب الأمراض اللي بتصيب الإنسان، بتصيب الحيوان، وعشان كده وقت ما أي حارس بيشوف أعراض مرض على أي حيوان، بيبلغ فورًا؛ كدور أساسي عليهم في الحفاظ على أرواح الحيوانات وإخلاء المسؤولية من عليهم في نفس الوقت. بيدينا مثال على طائر البشاروش في الحديقة، وإن الحارس عليه دور إنه يراقب المجموعة وهي خارجة من المبيت كل يوم الصبح، ويتابع أخر واحد أو اتنين خرجوا، وقتها بيعرف إن الحيوان عنده مشكلة وبيبلغ عنها.
نفس الطائر له حدوتة غريبة شوية مع الاكتئاب. وقت ما رجله تتكسر–ورغم إن رجليه هشّة جدًا-، "لو رقد برجليه في الأرض من رابع المستحيلات إنه يقوم تاني، كل اللي بيعمله إنه بيحزن على نفسه وبيفضل الأكل قصاده مابيقربلوش، وبنحاول نعالجه.. برضه مفيش فايدة، وبالتدريج بيموت" بيوضحلنا "محمود".

من طائر البشاروش للسلاحف المصرية اللي بيوضحلنا حارس الحديقة إنها بتزعل بسبب معاملة أغلب اللي بيربوها، زي إنهم بيجيبوها للعب أو مابيحافظوش على درجة الحرارة المناسبة ليها، وفي المكان اللي المفروض تتحط فيه. "سمر" ماكانتش تعرف يعني إيه اكتئاب يحصل للحيوان، غير وقت ما شافت ده عملي مع السلحف اليوناني اللي بتربيه، بعد ما جابتله سلحفة عشان يتزاوجوا في الربيع، وماتت فجأة، وبدأت أعراض الزعل تظهر على السلحف، زي إنه مابياكلش، وبيفضل قاعد في ركن مع نفسه وحركته قلت جدًا.
"وقت ما لاحظت علامات الزعل عليه استغربت وحاولت أعالجه بإني أهتم بيه أكتر من العادي، وأنزّله معايا مشاويري، وباقضي وقت اكتر معاه، شوية شوية وبدأ يرجع لحالته الطبيعية"، بتحكي سمر.

أكتر حيوان بيميل للاكتئاب هو أكتر حيوان اجتماعي
دكتور محمود حمدي بيوضلحنا إن الكلاب هي أكتر حيوانات اجتماعية وبتتأثر بسهولة بالبيئة المحيطة بيها، وده على عكس القطط، اللي بتصاب بالاكتئاب برضه لكن مش بنفس الدرجة اللي بتصاب بيها الكلاب، لإنها حيوانات بيتوتية شوية بطبيعتها ومابتحبش تغيَّر مكانها أو تدّخل عليها حد غريب عنها، "كنت أعرف واحد تعبان وقطه قعد جنبه ويوم ما توفى فضل قاعد عند رجليه ومأكلش مدة طويلة رغم إن دي مش عادته".  

فاطمة محمود، صاحبة ملجأ -Voice Of the Voiceless- للكلاب في سقارة، بتأكد لنا نفس كلام "حمدي": "مفيش حيوان مابيكتئبش، الكلاب حيوانات حساسة جدًا، والقطط برضه، لكن بيتم تعويضها بالأكل والمكان المناسب، والعلاج النفسي هو الحب والاهتمام في المرتبة الأولى، مش أكل وشرب". الحيوانات اللي بتساعدها "فاطمة"، بييجوا وهما مصابين بالاكتئاب لأسباب مختلفة، زي إنها بتيجي متعذبة، أو مضروبة، أو اتطردت من بيت هي متربية فيه، بتحكيلنا إن الكلاب اللي بيتم ضربها أو تعذيبها حتى لو مش شرسة، بتخاف تتواصل مع البني آدم وده سببه الخوف من إنها تتعرض للضرب مرة تانية.

رعاية 170 كلب و10 قطط حاجة مش سهلة، ومحتاجة تفرغ ومجهود، ده الي بتحاول توفره فاطمة "لأولادها"زي ما بتقول، بجانب ده هي دايمًا في رحلة إنقاذ مستمرة للكلاب اللي بتحتاج مساعدة، بتحكيلنا "فاطمة" عن أهم حواديت الإنقاذ، موقف هي فاكراه كويس، "كان كلب بلدي اتبنيته قبل ما اعمل الـ Shelter بعد ما شُفت بوست لواحدة بتحكي إن فيه كلب صاحبته حبسته لمدة 5 أو 6 شهور، ماترددتش ثانية عن إني اتبناه حتى وأنا ماعنديش مكان، وأخدته وهو خايف وبيعمل بول لا إرادي وبتجيله نوبات قلق وهلع، وحاولت أرجعه زي الأول وأحسن". وبتكمل: "ربنا ماخلقش الكون لينا لوحدنا، خلقنا كلنا لسبب، وأكيد مش من الأسباب دي إن أم تقول لابنها "لو ما أكلتش طبقك الكلب هياكلك، ده استحالة يكون منطق تربي بيه ولادك".

"فاطمة" بتعتقد إن الحيوانات بتنتحر عن عمد فعلًا، وادتنا مثال على ده من أكتر موقف هي فاكراه وكان له تأثير عليها، لما جتلها كلبة شيواوا عمرها 9 سنين، بعد ما صاحبتها ماتت وقرايبها رفضوا وجودها، الكلبة جالها اكتئاب وأضربت عن الأكل وكل اللي كان بيدخل جسمها هو المياه بس، وحبست نفسها في ركن فترة، وللأسف الكلبة ماتت. على قد ما هي مابتحبش كلمة "ملجأ" قد ما بتحب كلمة "بيتهم"، "فاطمة" مابترفضش أي حالة بتجيلها، وبتنزل تدور عليهم في كل مكان سواء شوارع أو تجمعات سكنية راقية، مابيفرقش معاها المكان قد ما بيفرق معاها إنقاذ الكلب وحمايته وعلاجه نفسيًا وعضويًا، "في مرة أخدت كلبة مولودة بإعاقة –رجليها أطول من إيديها- ومصابة بشلل تام. كل الدكاترة نصحوني بالموت الرحيم، بس أنا رفضت وبقيت بعاملها معاملة خاصة، ودلوقتي هي مبسوطة ومرتاحة نفسيًا".

في مدونة على موقع The Spruce Pet بعنوان "ازاي تعالج طيرك الأليف من الاكتئاب؟" بتوضح أسباب الاكتئاب عند الطيور، زي تغيير وضعيتهم في القفص، أو الملل أو فقدان الشريك، وده بتأكده إيمان عرفان، اللي بتربي 80 عصفور تقريبًا: "باعرف إنهم مكتئبين لما ريشهم بيُقع أو ساعات بيشدوا ريشهم بنفسهم أو بيبدأوا يبقوا عدوانيين ويضربوا وليفهم أو مابياكلوش كويس، كلها أعراض للاكتئاب اللي بيبقى ناتج عن أسباب كتير زي فقدان الوليف، أو ارتفاع درجة الحرارة، أو الأقفاص اللي حواليها يبقى فيهم عرسان جداد، وقتها بيبان عليهم الزعل".

ثقافة اكتئاب الحيوانات والتعامل معاه ومعالجته مش منتشرة في مصر، وده اللي حصل مع ريم عماد اللي ماكانتش تعرف إن الحيوان بيتأثر بشكل الأسلوب اللي بيم التعامل بيه معاه، "أخويا الصغير جاب لنا كلب من الشارع وأهلي كانوا رافضين وجوده تمامًا لأسباب تتعلق بالدين والشريعة، ومع إصرارهم على طرده، حاولت كذا مرة أمشيه من البيت، وبيرجع يوميًا يبات عند باب البيت، بمرور الوقت كان الزعل بيبان عليه لما باشوفه ومابعرفش أعمل حاجة ولا باقدر أقنع أهلي برجوعه، مرة واحدة الكلب اختفى ومن ساعتها ماظهرش تاني، دي أكتر حاجة مابسامحش نفسي عليها لحد النهاردة، لإني مش عارفة مصيره إيه دلوقتي".

اكتئاب الحيوان بيتعالج؟
بيجاوبنا دكتور محمود حمدي: "أيوة في الغالب، لإننا بنبدأ نشوف السبب الرئيسي في حالة الاكتئاب اللي عند الحيوان، ونبدأ نلعب على السبب ده، عن طريق توفير كل سُبل الاهتمام والرعاية، لان العلاج النفسي بيساعد في تحسين حالاتهم، وأكتر واحد يقدر يعالج الحيوان هو صاحبه، لأنه أكتر واحد فاهمه وبيتعامل معاه باستمرارية، وطرق العلاج بسيطة مش مكلفة، الكلاب نفسيتها بـ تتحسن بالنزول في الشارع والتمشية، القطط علاجها المزيكا واستقرار في مكان حلو"، بيكمل: "أما لو كانت الحالة يائسة والسبب مستمر، فيه علاجات بيطرية مخصصة لمراحل الاكتئاب عن القطط والكلاب، بتساعد في تحسين الحالة المزاجية، في الغالب الأدوية دي بتكون طبيعية زي الأعشاب مفيش ضرر منها خالص، طبعًا فيه أدوية بشرية ممكن نكتبها بس مابفضلش باستخدامها لأنها بتسبب أعراض جانبية".

"فاطمة" كان ليها نظرة مختلفة من ناحية علاج الاكتئاب، بجانب الاهتمام والرعاية، هي بتشوف إن علاجهم عن طريق نصيحة الناس بإنهم يحسوا إنهم مسؤولين عن روح وعليهم حقوق تجاههم، "نفسي أقول ماتجيبش حيوان لو أنت مش قد مسؤوليته وتربيته، ومافيش حاجة اسمها أجيب لبنتي كلب عشان نجحت وتلعب بيه، والسنة اللي بعدها نرميه عشان تعرف تركز، أو تجيب حيوان وتزهق منه فتقرر ترميه في الشارع أو توديه مكان هو مش متعود عليه. تربية الحيوان التزام مدى الحياة، يا تحترمه يا ماتجربوش من الأول".

Photography by Elzee's House of Art.
Esraa El-Gezawy