• اكتب معانا
  • ماتنسناش
  • تابعنا
الموضوع اللي جاي
إلغاء إجازة الأطباء المصريين العاملين بالخارج لتعويض النقص في مصر
الموضوع اللي فات
" 30 جنيه لكل شقة": قانون رسوم النظافة الجديدة

طلاق صوري وجواز عرفي: قصص ناس خدعت الحكومة لصرف معاشاتهم

الحد الأدنى للمعاش من 500 لـ 750 جنيه.

المعاش الاجتماعي اللي بتنص عليه المادة 554/لسنة 2007 بيقول إن من حق الأرملة أو الأرمل صرف معاش الزوج أو الزوجة المتوفي، ولو كانت المرأة مطلقة من حقها تاخد معاش والدها، بعد ما تقدم الأوراق الثبوتية لطلاقها. نفس المادة دي بتنص بعدم أحقية المرأة  أو الرجل في أخذ المعاش في حالة الجواز مرَّة تانية. المعاشات بتختلف حسب درجة الوظيفة اللي كان المتوفي بيشغلها، بس في ظل الظروف الاقتصادية الحالية، كتير بيرفعوا شعار "اللي يجي منهم أحسن منهم" في التعامل مع الحكومة. وبيتحايلوا على مؤسسات الدولة عشان ياخدوا المعاش بغير حق.

دار الإفتاء أعلنت إن في الحالة دي المعاش فلوسه حرام، لإنها جاية عن طريق غش وأكل أموال بغير حق. (1)

بس الفتوى دي غير رادعة للكل ولسّه فيه مليارات بتضيع في شكل معاشات لغير المستحقين، وده بطبيعة الحال بيأثر على المستحقين اللي بيوصل عددهم لـ مليون و700 ألف أسرة، يعني حوالي عدد 7 مليون و200 ألف مواطن. إيه الطريقة الروتينية لرصد المعاشات المصروفة لغير مستحقيها؟ وإيه العقوبة اللي بتقع على اللي بيعملوا كده؟ اتكلمنا مع موظفة في الشئون الاجتماعية في محافظة الجيزة وسمعنا حكايات عن ناس ابتكروا طرق خاصة لأخذ معاش مش من حقهم.

مجلس النواب أول السنة دي صدق على قانون رفع الحد الأدنى لقيمة المعاش حوالي 50% من 500 جنيه شهريًا لـ 750 جنيه، وبقى الحد الأقصى للزيادة 626 جنيه شهريًا. (2)

"آلاء" مش طرف مباشر في عملية النصب لأخذ المعاش، لكنها كانت شاهدة على واقعة منهم، بتحكي عن مراة عمها وبتقول: "لما عمي خد مكافأة من الجيش وكان متجوز من سنين طويلة، راح اتجوز واحدة تانية، فـ طبعًا مراته الأولانية اتطلقت رسمي ورجعت تاخد معاش والدها". بعد فترة عم "آلاء" رجع لرشده وطلق مراته الجديدة ورجع لمراته، قصة عادية بنسمعها كل يوم. مراة عمها كانت ذكية شوية وحسبت حساب "حركة غدر" جديدة. بتشرح "آلاء" أكتر: "لمَّا جم يتجوزوا تاني اتجوزوا عرفي، عشان هي كانت بتاخد معاش عن والدها اما اتطلقت وماكانتش عايزاه يقف". اللي حسبته مراة العم لقيته، بعد فترة جوزها اختفى، صحيوا من النوم مالقوهوش وماحدش يعرف راح فين، ومعاش الزوجة هو اللي فضل لها وسندها في تربية أولادها.

"ر.إ" مطلقة ومعاها طفلين في حضانتها، الجواز العرفي ماكانش خيار سهل ليها خوفًا من "معايرة" جوزها وأهله ليها في المستقبل. لكن لمَّا فكرت في النفقة اللي هتخسرها وحضانة ولادها اللي هتتاخد منها لو اتجوزت رسمي، اختارت العرفي. بتقولنا: "جوزي عايش بره مصر فماكانش هيعرف ياخد الولاد معاه وكان هيسيبهم معايا، بس مش هيديني فلوس وطبعًا بالقانون مش هاقدر اتكلم عشان هو القانوني إن مايبقوش معايا أصلًا. فـ اخترت اتجوز عرفي".

لمَّا سألناها عن حرمانية اللي بتعمله قالت: "أنا بصرف من مرتبي عليهم بس مش كفاية، الحلال إنهم يعيشوا في مستوى قليل وأبوهم معاه فلوس؟ القانون مش عادل ومش مع الأم وبيحط المطلقة بين نارين، يا أعيش لوحدي بقية عمري عشان آخد نفقة أصلًا مش كبيرة وأربي ولادي، يا أمارس حقي واتجوز بس ياخدوا مني عيالي أو يعيشوا معايا متهددين في السر".

"ر.إ" شايفة إن جوازها "عرفي" مايفرقش عن الرسمي في حاجة غير اختلاف في شكل الورقة بس. "كل الناس عارفة إنه جوزي وعايشين مع بعض وطبعًا أهلنا عارفين. جوزي الأولاني نفسه عارف وبيحاول يثبت بس مش دايمًا بيعرف، والدنيا في المصالح الحكومية لو المشكلة لسه في أولها بتتلم بالفلوس قبل ما توصل للمحكمة".

يصرف المعاش لحالات الشيخوخة والعجز وكبار السن بعد سن الستين أو الوفاة فإن توفى فلورثته من بعده حق المعاش مثل زوجته أو أبنائه أو أخته أو بنته إن كانت مطلقة أو لم تتزوج بعد.

بتقولنا "أ.خ" الموظفة بالتأمينات والمعاشات في وزارة التضامن الاجتماعي، إن البنت اللي بتتجوز بعد وفاة باباها بتاخد حاجة اسمها "منحة"، ودي عبارة عن مبلغ المعاش بتاعها مضروب في 12 شهر، وبعد كده مابيبقاش ليها معاش بما إنها اتجوزت. بس مش الكل بيمشي على النظام ده، "شفت بنات اتجوزت قبل وفاة ولادها، فلما يموت ويبقى فيه معاش تطلَّق من جوزها وتيجي تقولنا أنا اتطلقت. فنصرف ليها المعاش بما إنها مطلقة. بعدين لما تسكتفي من المعاش، تروح راجعة لجوزها، وتقول أنا اتجوزت، فـ نصرف لها المنحة بما إنها هتتجوز بعد وفاة والدها. وتبقى كسبت فلوس المعاش وفلوس المنحة. واحنا كموظفين بنبقى عارفين إن فترة الطلاق دي مابتبقاش طلاق بجد وبتبقى في الغالب متجوزاه عرفي بس مابنعرفش نثبت".

نقص المعلومات أو عدم المعرفة دي مسؤولية مين؟ بتقول "أ.خ" إن المشكلة في الربط بين جهاز التأمينات والمعاشات وجهاز السجل المدني، بطريقة تسمح بتبادل المعلومات وتخلينا كقاعدة بيانات في المعاشات دايمًا عندنا تحديثات صحيحة.

بتشرح كلامها بشكل أوضح: "أنا مابعرفش لو فلان اتجوز أو اطلق أو اتوفى إلا إذا حد بلغ أو لو لاحظت إن فيه معاش مابيتصرفش لمدة 4 شهور، وقتها بنوقفه أوتوماتيك ونبعت نسأل عن صاحبه". بتقولنا إن مشكلة البلاغات اللي بتوصل للمعاشات إن معظمها بيبقى كيدي. "إخوات غير أشقاء أو حد عايز يأذي حد فيجي يقولنا ده اتجوز أو ده اتطلق لكن أنا مابيظهرش عندي لوحدي على السيستم".

ولو كان المتوفى عنده أولاد هيبقى فيه فرق بين المعاش للولد وللبنت، فبالنسبة للولد فإنه يستحق صرف المعاش حتى يبلغ تعليمه أو حين يتم توظيفه وينقطع المعاش في سن السادسة والعشرين من عمره. لكن بالنسبة للبنت فإنها تستحق المعاش طالما لم تتزوج أو لو كانت مطلقة إن حصلت علي وظيفة فهنا الدولة تخيرها إما بالوظيفة أو بالمعاش الذي تتقاضاه.

فيه 6 أخوات بعد وفاة أبوهم قرروا مايقولوش اسم اختهم غير الشقيقة في إعلان الوراثة، وعشان هي غير متعلمة ومش عارفة إن ليها معاش، استمروا في أخذ حقها في معاش أبوها 17 سنة. لحد ما جوزها توفى وراحت تاخد معاشه، فـ اكتشفوا في قسم المعاشات إن ليها معاش من والدها. الواقعة دي شهدتها للأسف -على حد تعبيرها- "أ.خ". بتقولنا إنها كانت مشكلة كبيرة، "دي كانت كارثة. هما 17 سنة بيصرفوا أنصبة غلط، وكل سنة بتجد زيادات، فـ عشان نحسب من ساعة الوفاة ونحدد الأنصبة الصحيحة لكل ابن منهم، فيه 5 موظفين اتفرغوا لده، عشان بقى ندخلها في النظام مع الأخذ في الحسبان الزيادات والمنحة بتاعت جوازها وكل ده".

المعاش مش بس للابن والبنت اللي آبائهم بيموتوا، العكس كمان بيحصل. "ك.ب" أم لشهيد من شهداء الشرطة في محافظة المنوفية، ابنها أمين الشرطة اتوفى في أحداث إرهابية. بتقولنا والدته عن ازاي اتصرفوا في التعويضات المادية وقتها والمعاش الطبيعي والمعاش الاستثنائي، "مراته معاها معهد سنتين وهي اللي كانت بتروح كل المشاوير بدالنا، وعندها من ابني ولد في مدرسة فقولنا مش عايزين حاجة، مش هاكل من لحم ابني وكفاية عليها مصاريف الولد".

بعد فترة اتجوزت الأم وسابت ابنها عند أهل جوزها الشهيد، كانت أخدت المكافأة والتعويض ومافضلش غير المعاش الشهري، بس ده برضه ماقدروش أهله يحصلوا عليه، ليه؟ بتجاوب الأم الأمية: "مراة ابني اتجوزت عرفي، والبلد كلها عارفة إنها متجوزة بس على الورق هي أرملة الشهيد وبتروح تصرف معاشه، ولما روحنا المعاشات نقدم بلاغ حفظوه كيدي ومافيش حاجة اتغيرت وقالولنا الحل إنكم تثبتوا إنها متجوزة أو تبلغوا الآداب فتضطر تقول إنها متجوزة عرفي ووقتها يتحول رسمي والمعاش يتصرف لكم انتوا".

الحل إيه؟ بتقولنا "أ.خ" إن فيه مذكرة قانونية بتترفع لقسم التحقيقات، وهما بيتولوا الموضوع من الناحية دي، "في حالات معينة للصرف بدون وجه حق بنطالب الشخص اللي أخد الفلوس بردها، ولو ماعهوش بنخصمهم من معاشه الشهري. بس في أغلب الحالات مابتوصلش الموضوع مابيوصلش للحبس".

المصادر (1) و (2)

Home
خروجات النهاردة
Home
Home