-"بابا أنا نفسي ألعب كرة قدم زي أخويا"

-"اللعبة دي للولاد بس، أنتي العبي بالعروسة"

قصة بتحصل في بيوت مصرية كتير، من يوم ما بتتولد البنت بيتكتب عليها ألعاب معينة ووظايف معينة ورياضات معينة، وفي بلد زي مصر لعبتها الشعبية الأولى هي كرة القدم، ومع ذلك متحرمة على البنات، في وسط كل ده في شهر أغسطس اللي فات كان فيه ايفنت على فيسبوك للبنات فقط لعب كرة قدم في ملعب عام في إسكندرية.

7Race مبادرة في إسكندرية بتهتم بتنظيم الأحداث الرياضية، ومسؤول عنها عز الدين خالد، اللي بيحكيلنا "احنا عملنا دوري كرة قدم للشباب في إسكندرية، البنات طلبوا يشاركوا معانا، قلنالهم استنوا نعمل حاجة للبنات فقط، ومن هنا كان أول إيفنت خاص بالبنات في شهر 8"، الحدث الرياضي اللي كان عادي بالنسبة للمبادرة ماكنش عادي لبنات كتير في إسكندرية شاركوا فيه، وبنات من كل محافظات مصر بعتلهم رسايل "عايزين نلعب كرة".

"حلم حياتي ألعب كرة" رسايل كتير من النوعية دي جت للمبادرة وده خلاهم يعملوا يوم للعب كرة القدم للبنات في القاهرة وفي دمنهور، اللي طلبوا يتعلموا أكتر فاستمرت التدريبات لمدة شهر ونص هناك زي ما بيحكيلنا "عز": "البنات كانوا عايزين يعرفوا أكتر عن الكرة فعملنا دورة تدريبية مستمرة في دمنهور وفكرنا في حملتنا".

في الوقت اللي كل شوية بيجي إعلان في التليفزيون لأكاديميات كرة قدم بتتبنى المواهب المدفونة في شوارع مصر وحواريها، وبتصرف على الأطفال اللي بيلعبوا كرة ومش بيروحوا النادي، بيفضل البنات اللي مش عارفين يوصلوا لنادي يلعبوا فيه قاعدين في بيوتهم، بيبصوا للكرة بحسرة.

حملة "دوري كرة قدم للبنات في محافظات مصر" ابتدوها 7Race عشان يحققوا لبنات مصر حلمهم في لعب الكرة، بيقولنا "عز": "الحملة هدفها إنها تغطي تكاليف كل الماتشات والدوريات اللي بننظمها، من حجز ملاعب وتغطية للحدث وتكريمات للبنات اللي بيتعلموا"، وفي نفس الوقت اللي شغالة فيه الحملة، نظمت المبادرة السكندرية سجل للبنات عشان يقولوا نفسهم يلعبوا في أنهي محافظة، وكانت أكتر المحافظات المشاركة، الشرقية والغربية والمنصورة والمنيا، "لما الحملة تخلص هتكون دي أول محافظات بنعمل فيها أحداثنا الرياضية ونسعى إن البنات فيها يلعبوا كرة".

على الناحية التانية الموضوع مش وردي وسهل عشان البنات توصل لحلمها البسيط، عشان زي ما بيقولنا "عز": "مشاكل كتير بتقابلنا، مش كل الملاعب بتوافق نعمل دوري كرة قدم للبنات عشان لسه مقتنعين إن البنت مش مفروض تلعب"، وبيكمل ويقولنا "الكرة مش غلط ومش حرام ودي رياضة بتساعدها تخلي حياتها أحسن".

بنات كتير سنها بيبدأ من 10 سنين حلمها بس إنها تلعب كرة قدم في ملعب مفتوح، أو حتى تمسك الكرة في الشارع زي أخواتها الولاد، وده اللى بتسعى ليه مبادرة 7Race، "حلمنا إننا نعمل دوري كرة قدم في كل محافظات مصر، ونعمل بعدها نادي بيهتم بلعب البنات الكرة ونفسنا نقدر نشارك في أحداث عالمية ونوصل البنات اللي مش عارفين يعملوا ده لحلمهم"، بيقول "عز" اللي بيختم كلامه بجملة دايما بيرددها "دايمًا عشان تحقق حلمك لازم تساعد غيرك عشان يحقق حلمه" وعشان كده هو بيسعى لدورة كرة قدم بنات في محافظات مصر.

ممكن تشوف صفحة 7race من هنا وتساعدهم في المبادرة من هنا