• اكتب معانا
  • ماتنسناش
  • تابعنا
الموضوع اللي جاي
غطاس مصرى يحقق أطول غطسة في الشرق الأوسط
الموضوع اللي فات
مصمم سعودي بيتخيل لو مشاهير العالم اتولدوا في السعودية

عندهم لايحة وبيعملوا انتخابات.. روابط رسمية لأندية الكرة العالمية في مصر

تعرف إن النادي اللي بتشجعه له رابطة رسمية؟

في 2015 دخلت جروب رابطة ليفربول الرسمية في مصر، عن طريق صديق عضو في الرابطة، عرفته من جروب كورة تاني. جروب الرابطة منظم جدًا، بيتواصل بشكل مباشر مع إدارة ليفربول من خلال مجلس إدارة منتخب. بيغطي كل أخبار النادي وبينظم تجمعات وأوقات بيبيعوا منتجات خاصة بالفريق. بالصدفة بتكلم مع بنت صاحبتي ولاقيتها مبهورة بفكرة إن في كيانات في مصر تابعة لأكبر الفرق الأوربية، والكيانات دي ليها دستور ونظام موضوع وهيكلة مش هتلاقيها في نص الأحزاب المصرية مثلًا، الفرق بس إن دول مالهمش اهتمام غير الكورة والفريق اللي بيشجعوه.

الأولتراس في مصر من 2007، والخناقات دايرة عنهم من الوقت ده ولغاية النهاردة، بس دلوقتي ولأسباب كتير، روابط الأندية الأوروبية طلعت من الظل للنور، ساعد في كدة زيادة عدد مشجعين الكورة العالمية في مصر، كمان الأندية بره بتسهل فكرة إنك تحول الرابطة بتاعتك لكيان رسمي معترف بيه. إجراءات سهلة ومافيش تعقيدات والتواصل بيتم من خلال الإيملات. الكيانات دي مهمة لأصحابها لأنها بتمثلهم اللقا من بعد فراق، أنا واحد بشجع ليفربول من 2003 تقريبًا، بس في 2015 اكتشفت 10 آلاف بني على الأقل بيشجعوا النادي ده في نفس البلد اللي أنا فيها، وفي نفس المحافظة كمان، وبقالي اتصال مباشر بيهم وبنتابع كل حاجة تخص فريقنا مع بعض، حلو صح؟!

تعرف تشيلسي؟ النادي اللندني اللي بدأ طفرة كبيرة من سنة 2004 بعد ما اشتراه ملياردير روسي، وحوله من نادي متوسط لفريق كبير في إنجلترا وأوربا، بس حكاية مشجعي تشيلسي في مصر بدأت من قبل فلوس الملياردير الروسي إبراموفيتش. في 2003 كام واحد من اللي بيشجعوا تشيلسي في مصر، زهقوا من قلت عددهم وحبوا يجمعوا بعض و "يبشّروا بناديهم".

 رامي جبران، مؤسس رابطة "البلوز" في مصر، بيقولي: "كان هدفنا نوعّي الناس بتشيلسي ده ونعرفهم كل حاجة قديمة وجديدة عنه". رامي بقى هو حلقة الوصل بين الرابطة في مصر والنادي في لندن، من بعد ما بقت الرابطة رسمية في 2011. الروابط علشان تتحول رسمية ومعترف بيها، بيشترط النادي حاجات معينة، زي العضويات الدولية، يعني علشان تعمل رابطة لازم يبقى عندك عدد معين من الناس اللي عندهم عضويات رسمية في النادي. العضويات عندهم مش مكلفة، مش زي الأهلي ووادي دجلة خالص، يمكن لأن الأندية هناك مش اجتماعية، ومافيش مقر وخدمات اجتماعية وكدة، النادي يعني فرق رياضية وبس.

رابطة تشيلسي بتنظم للأعضاء تجمعات في الماتشات مهمة وفي كذا محافظة، وتجمعات ترفيهية للعب الكورة، ومسابقات بجوايز. "احنا حاليًا في جروب الفيسبوك 2500 واحد، ومش أي حد بيدخل، لازم بنتأكد إنه مشجع لتشيلسي الأول، كل اللي أقدر احكيهولك إننا في أول تجمع كنا 3 أنفار، دلوقتي التجمعات بتبقى بالمئات في كذا محافظة" بيقول رامي. الرابطة كان وشها حلو على النادي، بعد ما اتعملت بسنة حصلت لتشيلسي نقلة ضخمة وحولتهم لنادي بيدخل ينافس على كل بطولة، وبعد ما بقوا رابطة رسمية بسنة واحدة، كسب النادي بطولة دوري أبطال أوروبا.

الكورة العالمية بالنسبة لعدد كبير من المصريين هي برشلونة وريال مدريد، الناديين اللي ماتشاتهم بتنافس ماتشات الأهلي والزمالك في تجمعات القهاوي وتقفيل الشوارع. ريال مدريد له رابطته الرسمية في مصر. رابطة الملكي كان حظها أحسن في مصر، زي ما بيحكيلنا أحمد حمدي مسؤول الرابطة، "الرابطة موجودة من 2008 عن طريق راجل مصري عايش في إسبانيا اسمه إبراهيم القاضي وزوجته الإسبانية لوثيا فيرنانديث اللي قدروا يتواصلوا مع النادي وينشئوا رابطة رسمية في مصر، ووقتها نظموا عدة تجمعات في مقر الرابطة القديم واللي كان اسمه كافيه مدريد، والتجمعات دي كان بيحضرها مجموعة مصريين وإسبان عايشين في مصر".

الرابطة احتاجت مجموعة عضويات في النادي علشان تاخد التوثيق ويبقى معترف بيها، لكن وجود شخص في مدريد سهّل ده جدًا، وبيسهّل كمان التواصل بين إدارة النادي ومشجعينه في مصر، "كمان النادي مش متطلب ومعقد في مسألة الروابط دي عكس أندية كتير" بيقول أحمد.  وجودك في الرابطة الرسمية للنادي بيديك مميزات زي ما بيقول حمدي، "النادي بيقدر يوفرلنا تذاكر الماتشات حتى الماتشات الكبيرة اللي تذاكرها بتخلص بسرعة باعتبارنا رابطة رسمية، وده لو فيه مجال لحد يسافر يحضر ماتش لريال مدريد من الملعب، وكمان بيدينا خصومات على جولة المتحف وحضور التدريبات والتسوق في متجر النادي لأي حد تبع الرابطة".

مجلس إدارة الرابطة تم اختياره مرة واحدة بس من بداية التأسيس ومافيش انتخابات بتتعمل. الرابطة نشاطها وقف بعد ثورة يناير، لكن قرروا يرجعوا تاني في 2015. في الوقت الحالي الرابطة بتنظم تجمعات بتوصل ل 13 و 14 محافظة أحيانًا، "أعدادنا في التجمعات مش بتعدي ال50 شخص في معظم المحافظات، لكن في محافظات تانية العدد فيها بيكون أكبر، زي إسكندرية وبورسعيد، وفي النهائيات ممكن العدد يوصل ل1000 أو 1500".  في 2013 أحمد كان بينظم تجمعات في ماتشات ريال مدريد مع أصحابه وناس بتشجع النادي، وبعدها فكر يعمل رابطة رسمية للنادي في مصر، "عرفت إن في رابطة رسمية أصلا من 2008، تواصلنا مع الناس اللي ماسكينها وعرفنا إن نشاطهم وقف بعد الثورة، لكن قدرنا نرجعها تاني في 2015".

اللاعب الإنجليزي السابق جاري لينكر قال "كرة القدم لعبة سهلة للغاية حيث يركض 22 لاعباً وراء الكرة وفي النهاية يفوز الألمان"، وعلى مستوى الأندية لو هنتكلم عن الألمان، يبقى أكيد نقصد بايرن ميونخ. النادي البافاري له رابطة موجودة من 2011 تقريبًا، وبقت رسمية من 2013، حسب كلام رئيس الرابطة في مصر، عبد الحكيم طارق. زي ما قالنا عبد الحكيم، الرابطة زيها زي بقية الروابط، يعني بقت رسمية بعد ما بقى في عدد أعضاء في النادي معينين، بعدين بعتوا للنادي فوافق، بياخدوا خصومات على منتجات النادي، ولهم أولوية في حجز تذاكر الماتشات لو عاوزين. المميز في رابطة "البافاري" هي اللايحة الموضوعة والانتخابات، اللايحة بتقول إن رئيس الرابطة والنائب بيتم اختيارهم بالانتخاب المباشر من أعضاء الرابطة، والدورة الانتخابية مدتها سنتين، بعدها تتعمل انتخابات جديدة. كمان بيتعمل للأعضاء الجدد زي إنترفيو علشان يضمنوا إن الجروب بيضم فعلًا مشجعين البايرن، والسنة دي بقت الرابطة بتعمل كارنيه عضوية للأعضاء.

الروابط الرسمية للأندية كتيرة، في رابطة رسمية لليوفينتوس وبرشلونة ومانشيستر يونايتد وأرسنال. رابطة مانشيستر مثلا كانت بتعمل إيفنتات برعاية "شيفروليه" بصفته الراعي بتاع لمانشيستر، ورابطة ليفربول مثلًا كانت بتتواصل وتعمل لقاءات كل فترة مع روابط ليفربول في الدول العربية. رابطة ليفربول تحديدًا بتعمل انتخابات دورية كل سنة، الرئيس والنائب بيتم انتخابهم، وهما مع بعض بيختاروا قايمة بتدير الرابطة وتنظم تجماعاتها. آخر انتخابات حصلت كانت من شهرين، ووقتها كل قايمة قدمت برنامج، والقايمة اللي فازت أخدت نسبة مش أكتر من 51%. رابطة ليفربول بقى عليها شغل أكتر بكتير بعد النادي ما اشترى محمد صلاح، وبالتالي بقت كل قهاوي وكافيهات مصر مرحبة بيهم وبماتشات فريقهم، وجمهور النت اتضاعف على صفحتهم

Home
خروجات النهاردة
Home
Home