يقول المثل الشعبي في تشبيه معركة بين اتنين خسرانين: "عيان بيضرب في ميت" ومشيها يضرب، المختلف عليه فقط قبل الماتش هو تحديد مين العيان ومين الميت، طعمية مصر ولا كبسة السعودية؟ لكن الحقيقة إن كل اللي حصل من وقت صعودنا للمونديال ولغاية الحكم ما صفر النهاردة، يخلينا نستحق لقب الميت، وإكرام الميت دفنه.

الشوط الأول: ليّط يا حبيبي ليّط

بدأ كوبر الماتش بقراية مش بطالة لحقيقة إن الدفاع السعودي هش وبطئ وتعبان ومش حمل أي لاعب سريع وعنده أي كيو بني آدم، فقرر إنه يرمي صلاح في قلب الاتنين المدافعين السعوديين، عشان يكون أقرب لاعب مصري لمرمى الخصم، ويبعد مروان محسن عن الليلة دي. الموضوع نجح في أكتر من مرة، منها لقطة هدف صلاح ولقطة الانفراد اللي ضيعه صلاح بغرابة. كل اللي كان مطلوب من لاعيبتنا في الشوط الأول إنهم يرموا الكورة لصلاح في قلب المدافعين، وهو كان بيتعامل معاها بسهولة وسلاسة وجاب جول وضيع انفراد، قدر كمان يوزع اللعب كويس ويبعت تريزيجيه قدام الجول في أكتر من لقطة، كل ده وهو بيلعب ع الواقف وكانت حاجة لطيفة جدًا الصراحة في حق صلاح اللي كنت عاوز نكسب بس عشان هو يستاهل.

طول الفترة دي من اللعب، ماكانش معروف دور محدد لمروان محسن، يعني حاليًا صلاح يعتبر بيلعب مكانه، هو بقى هينزل نص الملعب يستلم ويسلم؟ بس هو مابيعرفش يعمل كده أصلًا، طب هل هيفضي مساحات لصلاح وتريزيجيه بتحركاته ويسحب مدافعين معاه؟ أكاد أجزم إن مدافعين السعودية كانوا بيسألوا هو مين ده أصلًا، طب مش كان الأنسب يلعب كهربا أو وردة خصوصًا إنه كان واضح إن في مساحات في دفاعات السعودية؟ كل الأسئلة دي كانت هتبقى لطيفة لو كنا ناويين نكمل هجوم وضغط أصلًا، أو حتى لو كنا هنلعب ع المرتدات ونشكل فرص وخطورة، بس احنا ماكناش ناويين فمش مهم.

بعد الجول وفيما تبقى من الشوط التاني جيبنا ورا بدون مبرر، بس يعني هو حد يعرف كنا جيبنا ورا قدام الكونغو وغينيا لما نسأل جيبنا ورا ليه قدام السعودية؟ منتخب مصر مع كوبر رغم إنه بيتكتل بأعداد كبيرة قصاد مرماه، إلا إن اختراقه بيكون أمر بسيط جدًا، عشان كده أداءنا وتماسكنا في ماتش أورجواي كان مفاجأة بالنسبالي، لكن العادي هو اللي ظهر النهاردة. مسكت الكورة السعودية وشكلت أكتر من فرصة وحجازي شال كورة من قبل خط الجول وفضلنا حاطين إيدينا على قلبنا واحنا بنلاعب منتخب تصنيف رابع.

 يكتمل الأداء المصري الجميل بضربة جزاء هبلة جدًا على أحمد فتحي اللي عنده 34 سنة بس لسه مش عارف يحط إيده ورا ضهره وهو طالع يقابل العرضية عشان الحكم ممكن يتلككه ويحسب عليه بلن عادي جدًا، بس الحضري تدخل. على ذكر الحضري، اللي دخل النهاردة التاريخ بكونه أكبر لاعب يلعب في المونديال ب45 سنة و6 شهور، وعشان ربنا كريم فاللقطة تكمل ويقدر الحضري يصد بلن من فهد المولد، مع ذلك المنتخب ماستغلش الدفعة المعنوية اللي مفروض تحصله بضياع فرصة السعودية في التعادل، وكمل في تمركزه الخلفي، لا منه ماسك كورة ولا منه بينفذ مرتدات يستغل بيها سرعة صلاح وضعف الدفاع السعودي ولا منه بيمسك كورة ويموت اللعب، فكان طبيعي القصة تخلص بالتعادل، حتى لو من ضربة جزاء تانية مشكوك فيها.

الشوط التاني: اقلع عشان ماتاخدش وقت

إيه مبرر  التراجع بالشكل ده في الشوط التاني؟ أكتر كمان من الشوط الأول، السعودية مسكت نص الملعب بكل بساطة ومابقاش مجرد استحواذ سلبي، بل بقى الهجوم السعودي في مواجهة مباشرة مع الحضري اللي شال كورتين كانوا يدخلوا أجوال بسهولة جدًا. كوبر كعادته تفنن في إنه يرمى الأوراق الهجومية اللي عنده بمنطق لاعب مكان لاعب وبدون أي خطة واضحة أو جمل محفوظة بنفذها أو أي حاجة.

 تريزيجيه في الشوط الأول كان بيلعب ناحية الشمال، نزل رمضان فهنبعت تريزيجيه ع اليمين. وردة لما نزل مكان عبد السعيد المصاب كان بيلعب صانع لعب، في الشوط التاني يلا نلعبه راس حربة، بعدين ننقله ناحية اليمين، لما كهربا نزل عشان يلعب هو مهاجم قدام صلاح أو يلعب رقم 10 تحت صلاح، مع رمضان اللي هيلعب في الشمال، مع عم محمد اللي جوز بنته سعدية ومصطفى اللي قدر أخيرًا يلاقي شغل في مجال دراسته وخالد اللي أمه مابتبطلش دعا ليه وسلامنا لعم سعيد البقال.. إلخ.

عدالة السماء تهبط على ستاد باليرمو

قبل سفر البعثة المصرية لروسيا بيوم أو اتنين، كان رئيس البعثة مجدي عبد الغني بيتخانق مع رئيس الاتحاد هاني أبو ريدة، عشان التاني اكتشف إن الأول أخد ملابس بتاعت منتخب الشباب بدون إذن، قام أبو ريدة استبعد عبد الغني، قام عبد الغني قال لو استبعدتوني هعمل مؤتمر صحفي وافضحكم، قام اتصالحوا، بعد ما حلوا مشكلة محمد صلاح بجمعتين، أصلهم كانوا بيستغلوا صورته في إعلانات لشركات منافسة للشركة اللي هو ماضي معاها وده يعرضه لغرامة، في نفس الأسبوع اللي أعلنا فيه عن شكل أتوبيس المنتخب اللي ماعجبش الناس، قام الجمهور قال عليه ده "الأولويز" فالنسويات زعلوا.

 روحنا عسكرنا في الشيشان اللي هي أبعد بلد عن الملاعب اللي هنلعب فيها، عشان رئيس الدولة كان هيوجب معانا، اللي هو أصلًا مجرم حرب وبيعمل نمرة على قفانا، قومنا استبعدنا سعد سمير من المعسكر عشان وجِب مع كهربا، مين سعد سمير ده؟ مجموعة من الحكايات العشوائية المتداخلة اللي مالهاش صلة ببعضها، ومالهاش أي صلة بالكورة والرياضة والتركيز والجدية والتنظيم، دي يوميات منتخب ماوصلش كاس عالم بقاله 28 سنة، فيوم ما وصل حس إن المهمة بهوأت منه. مش تبقى عدالة من السماء فعلًا لما نخسر 3 ماتشات ونرجع بأمنيات إننا ماكناش صعدنا؟