"ياريت سنك يزيد سنتين".. حكايات ناس ماهتموش بفرق العمر في الجواز
"العذراء والأشعر الأبيض" ده اسم الفيلم التمانيناتي اللي بيناقش حب بنت مراهقة لجوز أمها، ودي برضه الجملة اللي بتتقال لما الناس بتشوف جوازة فيها راجل أكبر من الست بفرق كبير، بس مؤخرًا الجوازات دي كترت على المستوى العام، فبقينا نشوفها ونقول "الله شكلهم حلو"، بس يمكن لما الموضوع يجي لحد عندنا نرفضه، يعني هل كل اللي اتبسطوا بإعلان عمرو دياب ارتباطه بدينا الشربيني بشكل رسمي، هيوافقوا يعيشوا قصة حب مشابهة الفرق فيها أكتر من 20 سنة؟ وهل اللي بيشوفوا الرئيس الفرنسي مع مراته اللي كانت مدرسته في يوم من الأيام والفرق بينهم 24 سنة، هيوافقوا إن ده يحصل في دوايرهم القريبة؟
لو دخلت أي جروب خاص بالبنات وعملت سيرش على كلمة "فرق السن"، هتلاقي أسئلة كتير عن الموضوع ده وحيرة من البنات يقبلوا ولا يرفضوا عرسان فرق السن بينهم كبير، وأغلب الردود بتقول لو الشخصية مناسبة وافقي طبعًا، طرحنا السؤال ده مرة كمان وماختلفتش الإجابات كتير لكن عرفنا من خلالها قصص.
"هبة 26 سنة" الفرق بينها وبين جوزها 9 سنين، بتقولنا "هبه": "قبل الجواز ماكنتش متخيلة إن الفرق بيني وبين جوزي يعدي 5 سنين، بس المعيار بالنسبالي كان إنه مايحسسنيش بالفرق ده ولا يرفض يعملي اللي عايزاه لأنه مش مناسب لسنه"، لما سألنا "هبة" إيه أقصى سن تقبل بيه، قالتلنا: "رأيي إنه مايعديش 12 أو 13 سنة عشان أكتر من كده هيعجزني قبل أواني"، أكبر المخاوف اللي قابلت "هبة" قبل الجواز كانت إنه يرفض شغلها وشكل حياتها لكن هو كان "متفاهم" بحسب وصفها، وهي بتنصح أي حد مقبل على زواج فيه فرق سن كبير إنه يكون فيه فترة خطوبة مش أقل من سنة عشان يحددوا مناسبين لبعض ولا لأ، لما سألنا "هبة" تقبل فرق السن ده يكون لصالح الست وتكون هي أكبر قالتلنا: "الست عقلها أكبر فلو هو كمان أصغر منها مش هيبقوا متوافقين".
"مريم 27 سنة" الفرق بينها وبين جوزها 10 سنين، "قبل الجواز كنت بفكر إني هتجوز واحد الفرق بينا 6 سنين بالكتير عشان نعيش حياتنا ونسافر ونسهر براحتنا، بس المعيار بالنسبالي كان الشخصية وطريقة التفكير"، بتقولنا "مريم" اللي بترجع تأكد إن المجتمع بيكون عائق أحيانًا، "يعني مينفعش واحدة عندها 25 سنة وتتجوز واحد 40 سنة مثلًا هيقولوا عليه متصابي وهي طمعانة فيه أو عايزة تخلص من أهلها رغم إنه ممكن يكونوا مناسبين لبعض".
الموضوع ماكانش سهل على "مريم" اللي قابلت مشاكل، "كانوا بيقولولي هيكبر وانتي هتفضلي حلوة وصغيرة، بس أنا فضلت مصممة على رأيي وفي الأول كان كلام الناس بيضايقني بس بعد كده مبقاش يفرق معايا"، فرق السن بالنسبة لـ"مريم" كان ميزة إيجابية إضافية عشان زي ما بتقولنا: "مابيغيرش من شغلي، ولا من أصحابي الشباب في الشغل، بيستحمل عصبيتي ومزاجي، كل حاجة بينا في البيت مشتركة، وده لأنه ناضج وعارف يتعامل معايا"، لما سألنا "مريم" عن فرق السن لو لصالح الست هتشوفه بنفس الطريقة ولا لأ، قالتلنا: "هيفضل عندي نفس الرأي، أنا أعرف واحد اتجوز واحدة أصغر منه بـ5 سنين وماكانش مبسوط خالص، ولما اتطلقوا واتجوز واحدة أكبر منه بـ6 سنين مبسوط جدًا معاها، ولو خيرناه هيختار اللي أكبر منه".
نجوى عندها 38 سنة وفرق السن بينها وبين جوزها 7 سنين بس وعندها بنت في 2 إعدادي، لكنها شافت قدامها قصة جواز عمها اللي بيكبر مراته بـ17 سنة وشافتها قصة ناجحة جدًا، فزي ما بتقولنا: "ماكانش فيه أي اعتراض من العيلة عشان عمي دكتور ومش باين عليه السن، لكن أنا شايفة إن فرق السن الحلو هو من 5 لـ7 بس"، نجوى قالتلنا إنها مستحيل تقبل تجوز بنتها شخص الفرق بينهم كبير وبررت ده: "عمي شخص مرح وشكله صغير لكن مش كل الناس كده، وأنا هحكم من خلال تجربتي اللي رغم إن فرق السن 7 بس، لكن أنا بحس إني لسه صغيرة وهو أكبر وعشان كده هبقى شايفة مشاكل هي مش شايفاها".
هدى عندها 20 سنة ومرتبطة بشخص 35 سنة، لكنها قابلت مشاكل كتير مع أهلها والمجتمع، "ماحدش مقتنع إني بحبه بجد هما شايفين إني شايفة فيه أبويا بس وإني بعد شوية هحس بالفرق، لكن أنا مقتنعة إننا مناسبين لبعض"، الفتاة العشرينية مدركة تمامًا المشاكل اللي ممكن تقابلهم لكنها بتقول إنها عارفة طرق حلها، "المشاكل بتكون إننا ماعندناش نفس الذكريات مابنتكلمش في نفس المواضيع، مابنحبش نفس الحاجات، بس ده مش موجود بينا وده ممكن يحصل واحنا الفرق بينا سنة واحدة لو من بيئات مختلفة، الموضوع مش سن بس". "هدى" لسه في مشاكل مع أهلها والمجتمع عشان يوافقوا على جوازها منه لكنها بتقول إنها هتكمل في الموضوع ده.
"أمل" الفرق بينها وبين جوزها 15 سنة وعندها 3 بنات لكنها رافضة تجوزهم فرق سن أكتر من 5 سنين، "احنا زمان جيلنا كان مختلف والبنت ماكانش ليها رأي ولا شخصية وفي الآخر قاعدين في البيت، وعادي لو هو أكبر، لكن جيلهم لازم يكون قريب منها ويقدر يشاركها في حياتها عشان ماتحسش إنها عجزت بدري".
على العكس بتقولنا "عفاف" اللي عندها بنتين وولدين، "أنا مش هقبل بنتي تتجوز واحد في سنها، هيبقى عيل مش فاهم هي عايزة إيه ومش مسؤول، لازم يكون أكبر منها بـ5 سنين على الأقل، غير كده أنا هرفض الجوازة".
اتواصلنا مع 3 من المأذونين الشرعيين في مصر، اللي اتفقوا إن لا يوجد ما يمنع ولا في قانون ولا في دين من فرق السن في الزواج طالما تخطوا السن القانوني المسموح بيه، لكن واحد منهم قالنا إنه لو على علاقة بأهل العريس أو العروسة وشايف إن السن أكتر من 15 سنة ممكن يكلمهم بشكل ودي، لكن في النهاية مايقدرش مايتمش الجوازة ولا يحرم ما أحله الله وسمح به القانون.
في دراسة نشرت في سكاي نيوز من جامعة إيموري في اتلانتا عن فرق السن، شملت الدراسة عينة من 3 آلاف شخص، اتوصلت إن فارق العمر من خمس سنين بيزيد من احتمال الخلاف بين الأزواج بنسبة 18%، وفارق العمر اللي بيوصل لـ10 سنين بيزيد من احتمال الخلاف بنسبة 39%، وبيرتفع الاحتمال ده لـ95% لو الفارق وصل لـ20 سنة. وتوصل الباحثين إن الفارق المناسب هو سنة واحدة وإن الأزواج دول نسبة طلاقهم كانت 3% بس.
في برنامج دعاء عامر على قناة النهار قال د. أحمد عمارة إن فرق السن المناسب من 5 لـ10 سنين، وكمان شاف إن فرق السن لو أقل من 5 سنين بيكون الزواج عرضة للمشاكل والخناقات أكتر، وفي برنامج رضوى الشربيني على نفس القناة قال محمد الغندور خبير العلاقات، إن فرق السن المناسب بيوصل لـ 13 سنة لصالح الراجل، وإنه ممكن يقبل بزواج ست اكبر وممكن يبقى زواج ناجح لكن دماغ الست بتسبق الراجل فيستحسن هو يكون أكبر عشان يقدر يحتويها.
