الجهاز القومي للاتصالات عمل إجراءات جديدة، بالتنسيق مع شركات المحمول المرخصة في مصر، لتشجيع الشحن الإلكتروني، وتقليل استخدام الوسائل التقليدية في شحن الرصيد. الإجراءات دي منها وقف طباعة وإصدار كروت الشحن البلاستيك العادية، فئة 50 جنيه فيما فوق، لكن الكروت القديمة اللي لسه موجودة في السوق عند التجار هيتم استخدامها بشكل طبيعي.

 

كمان الجهاز القومي للاتصالات عشان يشجع على استخدام وسائل الدفع وشحن الرصيد الإلكترونية، وافق على العروض اللي تقدمت بيها الشركات، بتقديم 50 ضعف الرصيد المشحون دقايق ووحدات مجانية، لما تشحن باستخدام وسيلة دفع إلكتروني.

 

المهندس حسام الجمل، الرئيس التنفيذي للجهاز القومي لتنظيم الاتصالات، أكد إن الإجراءات دي في إطار اهتمام الجهاز بتعزيز استخدام المعاملات الإلكترونية، بالتنسيق مع شركات المحمول في مصر، وده بيتماشى مع جهود الدولة اللي بتشجع على التحول الرقمي في كل المجالات.