4 شباب مصريين أطلقوا أول شركة للخطابات في مصر واللي هتقوم بمهمة كتابة جوابات على نوع خاص من الورق ويختموها بالشمع الأحمر ويربطوها بالحبل، عشان تكون شبه الجوابات القديمة. الشركة هتشتغل في 4 مناطق، هي المنصورة ودمياط وطنطا والمحلة، والفكرة بتاعت الشركة قايمة كلها على إعادة إحياء الشكل القديم للجوابات، بالورق البني والشمع الأحمر.

الشركة هتدي للعملاء 3 خيارات، لو اللي عاوز يبعت الجواب مش قادر يعبر عن مشاعره، الشباب الأربعة هيطلبوا منه إنه يعبر على قد ما يقدر، وهيسألوه هما مجموعة أسئلة، من خلال الإجابات هيقدروا يكتبوا الرسالة. الخيار التاني إن اللي عاوز يبعت جواب يكتبه كله زي ما هو، والشركة هتاخد محتوى الرسالة تبعته للخطاط وبس.

آخر خيار هو إن الورقة بتاعت الجواب تتبعت للعميل ويكتب الرسالة بنفسه، وتتاخد من العميل تتحط في المظروف وتتختم بالشمع الأحمر في حضوره، عشان يضمن الخصوصية، وفي كل الأحوال ماحدش هيقرا الرسالة غير الخطاط اللي بيكتبها. أسعار الخدمة مش كبيرة، الورقة والمظروف ب25 جنيه، ولو الرسالة بالحبر الطبيعي تدفع 10 جنيه، ولو هتعمل حاجة زي لف الجواب بحبل هتتكلف 5 جنيه والوردة الحمرة ب10 جنيه، أما التوصيل داخل المنصورة فبيتكلف 10 جنيه.

اعرف أكتر من صفحتهم على فيسبوك: https://www.facebook.com/RavenInkCo3/