امبارح في المؤتمر الرسمي لشركة Apple، أعلن مديرها التنفيذي عن صدور أيفون 8 وأيفون 8 بلس، بس الفاجأة كانت أيفون إكس، واللي نازل بمناسبة الاحتفال بـ10 سنين على بداية إنتاج شركة أبل للموبايلات. التليفون الجديد يعتبر مختلف تمامًا عن مجموعة الأيفون اللي فاتت، لأنه مصمم كشاشة بالكامل.

المدير التنفيذي لشركة أبل، قال إن الجهاز الجديد مصنوع من الصلب غير القابل للصدأ ومقاوم للماء والأتربة، ومزود بخاصية "تعريف الوجه" لفتح قفل التليفون.  شاشة الموبايل من نوع "سوبر ريتينا" وعرضها 5.8 بوصة، والجديد إن مافيش زرار للقايمة الرئيسية، ده غير إنه بيفتح بخاصية الـFace ID اللي بيتعرف على وش المستخدم، ومزود كمان بشاحن لاسلكي QR وكاميرا أمامية 7 ميجابكسل وكاميرا خلفية 12 ميجابكسل. عمر البطارية بيزيد ساعتين عن الموبايلات اللي فاتت. سعر الموبايل هيبدأ من 999 دولار وهيبتدوا يستقبلوا طلبات الشرا من يوم 27 أكتوبر، وهيبتدي الشحن من 3 نوفمبر.