ساندويتش إيه ده اللي أدفع فيه 1500 جنيه! لو روحت مدينة نصر اليومين دول، في مطعم هناك أعلن بكل فخر إن عنده ساندويتش برجر ب1495 جنيه مصري فقط لا غير، يعني قول 1500 جنيه. المطعم اسمه Food Gun، والساندويتش اسمه بازوكا، وتقريبًا لو كنت هتشتري بازوكا بجد كانت ممكن تكلفك أقل من كدة. المطعم في صفحته على فيسبوك، أكد للناس إن الرقم اللي قريتوه ده حقيقي يا جماعة، وكمان شرحلهم مكونات الساندويتش اللي يستحق تدفع فيه 1500 جنيه.

مكونات البازوكا كالآتي: قطعة برجر 250 جرام من الواجو بيف، وده لحمة جاية من بقرة متربية تربية خصوصي في اليابان، وبتنتج لحوم بدهون غير مشبعة، وبيشربوها نبيد كمان علشان تهضم كويس، دي البقرة اه، حسب كلام المطعم يعني. وضيف على اللحنة جبنة سويسري ومشروم وعيش بقى والذي منه. السؤال دلوقتي: البتاع ده على الأقل بيشبع؟ ولا لو أخدت قرض وروحت اشتريته هخلص أكل وأطلع أجيب علبة كشري أكمل بيها؟!