مؤسسة "بيل جيتس" الخيرية عملت قايمة بأكتر الحيوانات اللي بتسبب الموت للإنسان سنويًا. القايمة فيها شوية مفاجآت، هتلاقي في المركز الأول "الناموسة"، الحشرة دي بتسبب موت 725 ألف إنسان كل سنة، عن طريق الأمراض اللي بتنقلها، غير طبعًا إنها بتقعدك طول الصيف مابتنامش من التقريص، حاجة سخيفة جدًا يعني. 

الحيوان اللي احتل المركز التاني هو الإنسان، الحيوان ده بيسبب موت 425 ألف شخص كل سنة، ما بين حروب ونزاعات مسلحة وحوادث، حيوان فعلًا، ورغم كل اللي الإنسان بيعمله ده، الناموسة متفوقة عليه. في المركز التالت التعبان. مفاجأة المركز الرابع هي الكلب، الكلب اللي بتحبه وبتلعب معاه ده، بيقتل ناس سنويًا أكتر من الأسود والنمور ب 50 ألف حالة سنويًا، بس فداهم والله.

باقي القايمة فيها حيوانات مفترسة زي الأسود والتماسيح وأسماك القرش، حتى الأفيال موجودة في القايمة.