"يا نتأهل يا ما تلحقوناش"، دي اسم الحملة اللي عملتها شركة "أورانج" بمناسبة إن مصر موقفها كويس في تصفيات كاس العالم وفي أمل نصعد وكدة. الإعلان زي ما شوفناه جايب ناس عواجيز بيقولوا يعني إنهم هيموتوا خلاص، فأنجزوا واصعدوا. لكن جهاز حماية المستهلك بناءً على شكوى اتقدمت ليه، قرر يشيل الإعلان خالص لحين تعديله وحذف العبارات والكلمات المسيئة لمشاعر كبار السن.

الشكوى اللي تقدمت بيها هي وزيرة التضامن الاجتماعي غادة والي، وقالت في الشكوى إن الإعلان بيسئ لكبار السن وبيظهرهم بشكل غير لائق. الجهاز قال إنه اتكلم مع شركة أورانج وعلى طول استجابوا، وقرروا إن مافيش مشكلة خالص وهنشيل الألفاظ واللقطات اللي استفزت الناس. الناس على المواقع والسوشيال ميديا تباينت ردود أفعالهم على الإعلان، ناس عجبهم جدًا وناس هاجموه واعتبروه كئيب وبيفوّل على الناس.