حسب المنشور في موقع "اليوم السابع"، هيكتور كوبر المدير الفني للمنتخب الوطني المصري، قرر هو وجهازه الفني إن لاعيبة المنتخب تفطر في شهر رمضان الجاي، واللي وقتها هيكونوا في المعسكر الاستعدادي لماتشات كاس العالم 2018 في روسيا. اللاعيبة هتكون بتخوض تدريبات قوية وماتشات استعدادية، غير إن الصيام في روسيا هتوصل عدد ساعاته ل18 ساعة، وده اللي هيكون مستحيل.

مسألة الصيام من عدمه، والأعذار والرخص اللي ممكن تخلي اللاعيبة يقرروا يفطروا، حاجة ماتخصش حد في النهاية، وفي الأغلب اللاعيبة مابتطلعش تعلن إنهم صايمين أو فاطرين. على جانب تاني، القرعة كانت وقعت المنتخب في مجموعة فيها البلد المستضيف روسيا وأورجواي والمنتخب العربي السعودي.