الإعلامي وائل الإبراشي عرض امبارح في برنامجه "العاشرة مساءً"، قصة بنت مصرية عايشة في بريطانيا، وتم الاعتداء عليها وضربها من 10 بنات بريطانيات من أصول أفريقية. البنت اسمها مريم مصطفى، والدتها قالت للبرنامج إن البنات سحلوها 20 متر في الشارع، وحتى بعد ما مريم هربت منهم في أتوبيس نقل عام، طلعوا وراها وفضلوا يضربوها لغاية ما أغمى عليها، وسواق الأتوبيس هو اللي طلب الإسعاف.

الأم قالت إن الاعتداء سببه العنصرية، وإن دي مش أول مرة تحصل، وسبق إن بنتين من نفس المجموعة، اعتدوا على بنتها قبل كدة. حاليًا مريم موجودة في المستشفى وفي حالة خطرة حسب كلام والدتها. أحمد حمزة محامي مريم مصطفى، قال إن المصرية عندها 18 سنة وبتدرس الهندسة في بريطانيا، وأكد إن حادث الاعتداء جريمة عنصرية. 

حسب أم مريم، البنات اللي ارتكبوا الجريمة ماتمش القبض عليهم، رغم إنه فات أسبوع على الواقعة.

صورة الموضوع أرشيفية