بسبب مواقفه وجرأته وانتقاداته المباشرة للحكومات ورؤساء الجمهورية في أشعاره، اتاخد انطباع عام عن الراحل أحمد فؤاد نجم إنه شاعر سياسي، خصوصًا إن أشهر أعماله كانت هي الأعمال السياسية اللي لحنها وغناها شريكه الشيخ إمام. بس نجم له أعمال تانية مع مطربين رومانسيين وعمل تترات مسلسلات وأغاني أفلام ومسرحيات، وبما إن النهاردة 3 ديسمبر، ذكرى وفاة "الفاجومي" دي ليست بـ7 أغاني مش مشهورة من كتابة أحمد فؤاد نجم.

• فارس: هنتوب

"هنتوب لندوب في غرامك دوب يا أبو خال ع الخد وشال ع التوب"

سنة 1993 كان فارس بينزل ألبوم "سوسنة" اللي بيعتبر واحد من أنجح ألبومات المطرب اللي اتعرف في التسعينات. لو كنت بتفتح القناة الخامسة في الفترة دي، أكيد اتفرجت على كليب "هنتوب" من ألبوم "سوسنة". الأغنية من كلمات أحمد فؤاد نجم.

• حنان ماضي: ليلة عشق

"فى ليلة عشق واخداني على شط الهوا التاني قابلت البحر في عيونك شربت عطشت من تاني"

يحصل إيه لو اتحطت كلمات أحمد فؤاد نجم على صوت حنان ماضي؟ حنان ماضي كان ليها خامة صوت مختلفة تمامًا، كنت تحس إنها بتهمس في ودانك مش بتغني. همست حنان ماضي بكلمات "الفاجومي" في أغنية ليلة عشق وألحان ياسر عبد الرحمن. في مصادر بتقول الأغنية كانت سنة 1992 ومصادر تانية بتقول سنة 1994، بس الأكيد إنك ممكن تسمعها لغاية النهاردة.

• لوسي: أبيض وأسود

الفوازير كانت فقرة ثابتة بالنسبة للمصريين في رمضان، وارتبطت بنجوم زي نيللي وشريهان، لما نيللي وشريهان بطلوا فوازير كان لازم الفوازير تكمل حتى لو من غيرهم، طب مين هيعمل الفوازير؟ ممكن لوسي ونجيب معاها أشرف عبد الباقي ومحمد هنيدي. أحمد فؤاد نجم كتب أشعار فوازير "أبيض وأسود" الجزء الأول وغنتها لوسي وأشرف وهنيدي ولحنها الموسيقار عمار الشريعي، سنة 1997.

• جورج وسوف: صياد الطيور

يا صَيّادْ الطّيُورْ يا خالِي .. صُباعَكْ عَنْ زِنادِ الْمُوتْ أنا عَصْفُورْ ضَعِيفِ الْحالْ .. ولا كَفّيشْ لَعْيالَكْ قُوتْ

سلطان الطرب جورج وسوف غنى من كلمات "نجم" أغنية صياد الطيور سنة 1993. الأغنية طربية ومدتها طويلة نوعًا ما -13 دقيقة- مقارنة بالأغاني السريعة اللي كانت طاغية على مشهد الغنا في الوقت ده. لو بتحب "أبو وديع" جرب تسمعه في الأغنية دي هتحبه أكتر.

• لطفي بوشناق: اتجمعوا

"يا مقربين الفجر نوره ومطلعه مدوا المسامع في المجامع واسمعوا صرخة مغني الحي من جوف العدم

اتجمعوا.. اتجمعوا .. اتجمعوا"

من آخر الحاجات اللي كتبها أحمد فؤاد نجم قبل وفاته في 2013، ولحنها وغناها لطفي بوشناق واتذاعت على قناة القاهرة والناس. الأغنية ليها طابع سياسي وثوري نوعًا ما عكس الأغاني التانية، والقصيدة تعتبر مشهورة، بس الأغنية اللي عملها لطفي هي اللي مأخدتش حقها الكافي من النجاح والشهرة.

الأغنية ليها نسخة تانية بلحن مختلف وبصوت مطفي سعيد

• حقي برقبتي: محمد رحيم

أنا بحب محمد رحيم كملحن أكتر منه كمغني، وهو بشكل عام ماغناش كتير وتركيزه أكتر على التلحين. "رحيم" غنى تترات مسلسل "حقي برقبتي" سنة 2009. المسلسل من بطولة ماجدة زكي وحسن حسني ومش ناس كتير هتفتكره لأنه مانجحش بشكل كبير، بس أغاني التترات من تأليف "نجم". التتر ده هيديك فكرة عن إن "نجم" كان شاعر حريف وبيقدر يعمل أغاني لايت وأغاني سوق وتجارية حلوة.

• هيثم شاكر: وعد ومش مكتوب

السنة 2009 برضه، بس المرة دي هيثم شاكر. أول مرة هيثم شاكر يغني فيها تتر مسلسل كان حظه حلو وغنى من كلمات أحمد فؤاد نجم. المسلسل اسمه "وعد ومش مكتوب" من بطولة محمود ياسين ودلال عبد العزيز ودرة، ماحدش هيفتكره عشان مانجحش، ده اللي هيخلي الناس تنسى أشعار "نجم" اللي في التترات.

نجم كتب حاجات كتير متنوعة ومختلفة، لو على تترات المسلسلات هتلاقي تتر "زيزينيا" العظيم و تتر "فريسكا" وتتر "آدم"، كمان كتب أشعار مسرحيات زي "الملك لير" و "الملك هو الملك". وكتب لمطربين مختلفين، زي علي الحجار ومحمد الحلو وكلها حاجات تستحق تتسمع وتتشاف والناس تعرفها، زي ما هما عارفين أشعاره الوطنية والسياسية.