لو بتتفرج على كرتون أو أفلام عربي قديمة، هتلاقي دايمًا الجدة طالعة في صورة معتادة، قاعدة على كرسي وجنبها بكرة الخيط وبتفصَّل كروشيه أو تريكوه، أيهما أقرب لميزانية الإنتاج يعني، رغم إنه في بنات صغيرة وبيضة وحلوة وطعمة وقشطة، بيفصَّلوا وبيعملوا حاجات يدوية عادي!

السوشيال ميديا زي ما قولنا قبل كده فتحت باب لبنات وستات كتير إنهم يسوَّقوا شغلهم بسهولة وهما قاعدين في البيت، وحتى لو بينزلوا ويشوفوا الدنيا، هو برضه بقى عامل أساسي ومهم، لو ماكانش الأهم، في التسويق. هنا جمَّعنا شوية بنات هتحتاجي تعرفي عنهم أكتر لو بتبدأي البيزنس الخاص بيكي، أو لو عايزة تهادي حد بهدية مش تقليدية، أو لمجرد بس إنك تشوفي طموحهم وإصرارهم لو عايزة حاجة تشجَّعِك تكملي.

1- إيمان عاطف

لو اتفرجت على مسلسل "واحدة الغروب" وشُفت الإكسسوار اللي ظهرت بيه "منة شلبي" طول المسلسل وسألت مين اللي عمل الإكسسوار ده، فـ هيّ إيمان عاطف، من أوائل البنات اللي خلقت فكرة الإكسسوار اللي يشبه العصور بتاعت زمان، البداية كانت من 3 سنين لما بدأت شغل الريزن (طبقة المينا اللي بيتحط تحتها الصور)، وطوّرت من نفسها لحد ما وصلت لنوع معين من الإكسسوار بياخد مجهود وشغل كتير.

إيمان عندها بيدج أورفليس، وبتبيع أونلاين، وبتعمل أوبن داي تعرض فيه شغلها كل شهر في القاهرة وإسكندرية والمنصورة. 

إيمان اهتمت بفكرة إن شغلها يظهر بأحسن شكل، ف لجأت لمصوّر محترف وموديلز وده ساعدها على نجاح مشروعها بجانب موهبتها.

2- تقى عسل

بدأت من 3 سنين، والبداية كانت لما شافت رسمة وحبّت إنها تكون على النوت بوك بتاعتها، فقررت إن النوت بوك تاخد شكل الرسمة، جربت إنها تطبع الرسمة على النوت بوك، بس ماظهرتش بالشكل اللي يرضيها، فحاولت مرة تانية بإنها تشتري 10 نوت بوكس وطبعت الرسومات عليهم. حطتهم على البيدج اللي عملتها عشان تنزّل عليها شغلها، الكوليكشن الصغيرة نجحت.. وقررت إنها تبدّل الرسومات اللي بتستخدمها لرسومات هي رسماها بنفسها Illustation.

عشان تكون أصدق وأكتر موهبة. وبالفعل نجحت، المميز في شغل تقى حاجتين:
إنها مش متوقفة على نوت بوكس بس، بتشتغل رسم على البراويز وورق الهدايا ورسومات على دبابيس وعلى أظرف الجوابات بتاعت الزمن الجميل، وإن أسعارها متوسطة ومناسبة.

هتلاقوا شغلها في جاليري "أزرق وبني" وأماكن تانية، تابعوا صفحتها Violette عشان تعرفوا أكتر عن منتجاتها.

 3- سارة أحمد عبد العليم
بدأت من سنتين بالرسم، وقررت إنها تطوّر نفسها في حاجة مختلفة وصعبة لكن تستاهل المحاولة، وهي الرسم على الجلد الطبيعي، ما أخدتش ورشة أو كورسات وعلّمت نفسها.

لما سألناها عن سبب تسمية البيدج "كولاج"، قالت إن كولاج هو نوع الفن المفضل عندها لإنه فن التعدد، تعدد الخامات، تعدد الأفكار، تعدد كل شيء، وهو أكتر أنواع الفنون تحرر من القواعد، لإنه مابيقيدهاش بمسمى معين تلتزم بيها أو خطوط تمشي عليها. سارة بتحلَّم تكبّر مشروعها ويبقى عندها الفرصة إنها تسوًّق لشغلها برّه مصر.

ممكن تشوف شغل سارة على البيدج بتاعتها Collage

 4- نهال عرفة

بتدرس طب، وبدأت بُحبها للخطوط وأنواعه، لكن شدّها فن Embroidery Art أو فن التطريز بالخيوط، لما كانت بتتفرج عليه على المواقع الأجنبية، وكان عندها رغبة في إنها تنفذ شغفها بالخطوط والرسم "على القماش"، بحيث تكون حاجة حيوية أكتر، والدتها علمتها أول غرزتين وبعدها هيًّ كملت وعلمت نفسها بنفسها، وبتطور من شغلها كل يوم.

 

ماعندهاش صفحة على الفيسبوك، بس بتعتمد في التسويق لشغلها على الأكونت الشخصي بتاعها.

5- هاجر ناجي

إيه اللي جاب تجارة تخصص نظم ومعلومات وبرمجة للـ Graphic Designing والأشغال اليدوية؟ "هاجر" جمعت بين التلاتة من خلال مشروعها Charizma Art، درست الأولى واشتغلت شوية في التانية وقررت تحول تصميماتها لحاجات يدوية ملموسة، سواء عن طريق الصلصال الحراري أو الأحجار اللي بتعمل ديكوباج عليها عشان توثَّق بيها مشاهد مهمة في حياة جيل التمانينات والتسعينات.

تقدروا تلاقوا أعمال "هاجر" في "ق جاليري" في وسط البلد و"فيلا 219" في سبورتنج في إسكندرية.

6- تقى أحمد

عندها 21 سنة وبدأت بالكروشيه وعلّمت نفسها تعمل ميداليات وكوفيات وحاجات بسيطة، ثم فساتين للأطفال.. بس بعدها قررت تتجه للتفصيل والخياطة. فـ أخدت كورس تفصيل وبعدها اتدربت مع نفسها، بدأت بفساتين ليها ولصحابها ولقت إن شغلها بيعجب الناس. 

بدأت تهتم بتطوير نفسها وشغلها، ف أخدت كورس تصميم أزياء، وكورس باترون إيطالي، اشترت مكن خياطة وأوفر من الدخل اللي بييجي لها من شغلها، من طموحات تُقى إنها تاخد كورس تفصيل سواريه، وتفتح أتيليه خاص بيها. لو عايزة تعملي تصميم مختلف ومميز ممكن تكلميها على الأكونت الشخصي بتاعها.

8- مي علي

طول عمري بسمع كلمة "فنان شامل" لكن مابفهمهاش أوي، "مي"، خريجة الفنون الجميلة، فهِّمتني أكتر معنى الكلمة. صناديق خشب customized تلاقي، جرافيتي على الحيطة تلاقي، فوانيس تلاقي، عُليقات تلاقي، شنطة تلاقي.

الميزة في "مي" إنها بتبيع شغلها في دمياط، تقدر تتابعها من هنا.

 9- أسما جلال

بدأت من 4 سنين بإنها بتعمل شنط قماش هاند ميد "يدوية" مابيدخلش فيها غير مكنة الخياطة، وبتستخدم أنواع قماش مختلفة، بتقصه وتفصله وتحوّله لشنط، كمان بترسم على القماش بألوان مستوردة مخصصة للقماش مابتطلعش مع الغسيل وده ضمان لمصداقية شغلها.

أسما بتعمل شنط كروس، باك، كتف، بورتفيهات، بوكتس صغيرة، ولكل الأعمار وسواء بنات أو ولاد وممكن تبعت لها الديزاين اللي عايزه، وهي هتنفذه.

بجانب إنها بتبيع أونلاين، فتحت مقر "باب الورد" في وسط البلد لتسويق شغلها.

 10- مريم مغربي

بتعمل نوع مختلف من السلاسل، بس فعلًا مميز. سمت البيدج بتاعتها "أزود" نسبة للقرية في المغرب العربى اللي معروفة بالشغل اليدوى، بس أصحاب المنتجات اليدوية هناك بيعانوا فى تسويق منتاجتهم وقلة تقدير لشغلهم، علشات كده فضّلت إن اسم مشروعها يكون "أزود". مريم بتستخدم في شغلها المعدن المأكسد، لأنه بيحتفظ بلونه مدة أطول من المعادن التانية.