في حوار سابق مع رسَّام جرافيتي شارك في توثيق لحظات الثورة على حيطان وسط البلد، قالي إن الكتابة على الحيطان بتشبه الكتابة على الفيسبوك لمجموعة من الأصدقاء، الفرق بس إن الحيطة في الشارع هيشوفها يوميًا ناس صعب يوصلوا ليها على الفيسبوك، فـأنت بتنزل مخصوص تكتب لهم. بس واضح إن مش ده السبب الوحيد للكتابة على الحيطان، هنشوف سوا، جُمل كان ممكن أصحابها يوصَّلوها بشكل مباشر للي بيكلِّموه، لكنهم -لسبب مجهول- قرروا يشاركونا الجمل دي على حيطان عامة.

*أنتي أحلى من شوارع وسط البلد

المكان: شارع مترو البحوث

مش سهل تلاقي منطقة بيزورها ناس من مستويات اجتماعية وخلفيات ثقافية مختلفة، بس وسط البلد قدرت تعمل ده. محمد محمود والشيخ ريحان وشوربة القزاز في ليالي الاشتباكات أيام الثورة، طلعب حرب ومشاهد السينما المتصورة فيه المحفورة في ذاكرتنا، القهاوي اللي استقبلت البنات من قبل ما يبقى وجودهم في قهاوي شعبية شيء مقبول مجتمعيًا. كل المميزات دي ماكانتش كفاية عند واحد بيحب، وفي مقارنة سريعة بحبيبته، شافها أحلى من وسط البلد وتاريخها الطويل.

*عشان البُعد بيموِّت يجوز القرب يحييني.. وحشتيني

المكان: الدقي

طبعًا ده كلام غير علمي ولا منطقي، بس من امتى الحب والمشاعر بيمشوا بالمنطق والنظريات العلمية؟ الجملة هتلمِّس معاك وتفكَّرك بأيام كنت حاسس فيها إنك شخص فاضي، لو كنت محظوظ هتلاقي وظايفك البيولوجية كانت شغالة بس في حاجة غلط أو حاجة ناقصة. 

*متى اللقاء فقد اختل توازن الصبر بلهفتي؟

المكان: شارع الهرم

هو في حب من غير لهفة؟ طيب في واحد بيحب ومستني اللقا، لهفته ممكن تتطفي بالوقت؟

*لن تسير وحدك أبدًا

المكان: إسكندرية - الشاطبي

طبعًا العهدة على الكاتب، خدها من جماهير Liverpool وكتبها جنب نادي الاتحاد السكندري في إسكندرية -غالبًا هو مشجِّع ليه- أنا مش متأكدة من اللي بيقوله ده بصراحة، بس أتمنى.

*كنت نور كنت ضلَّك

المكان: إسكندرية - الشاطبي

على الرغم من شاعرية الجملة للبعض، اللي بتدل إن الحبيبين بيكملوا بعض، إلا إن حدوتة الأغنية كاملة مخيفة، ولفظ "كان" موجع للقلب. ماكانش ينفع نفضل نور وضل بعض؟

*بس قوللي مين بِدَّك ياني كون

المكان: إسكندرية - الشاطبي

اللحظة اللي هتتكلم فيها بلسان حال "حامد سنو" وتقول الجملة دي وتختمها بـ "عشان أرضيك"، هتعرف إنك دخلت لعبة مالهاش نهاية مضمونة، أو يمكن مالهاش نهاية أصلًا. هتعرف في اللحظة دي إنك بتختبر شعور ممكن توصفه بإنه مقدَّس، بيصيب معظم الناس وفي منهم بيعيش حياته كلها في محاولة للتخلص من آثاره أو التعايش معاه.

 *لم نفترق ولكننا لم نلتقي أبدًا

المكان: وسط البلد - محمد محمود

الذكريات الكتير، اللحظات الحميمية اللي ماحدش هيفهمها غير طرفين العلاقة، الأسرار الصغيرة والمشاركات العبيطة اللي بينهم، كل دي حاجات بتوجع وقت الفراق. بس ياترى وجعهم أكبر ولا وجع وجودك في علاقة الطرف التاني فيها مش شايفك أصلًا؟ على الورق وبشكل رسمي، أنتوا ماتفارقتوش، بس مين قال أصلًا إنكم اتلاقيتوا؟

*قوليلي حاجات قبل ما ينتهي الكلام

المكان: وسط البلد - محمد محمود

في مرحلة بتوصلها بعض العلاقات، بتبقى النهاية واضحة والكل شايفها جاية وبتقرَّب، إلا طرفين العلاقة، اللي بيبقوا مكمِّلين بسذاجة المُحبين وضعفهم، في أول لحظة إدراك تصيب حد فيهم، بتلاقيه بيطلب من التاني يقوله حاجات قبل ما ينتهي الكلام، ما هو كده كده هينتهي.

*ليّا عشم ويّاك يا جميل

المكان: وسط البلد - ميدان التحرير

غرب حاجة في المقطع ده هو استخدام "ويّاك" بدل "فيك"، كأن العشم وعدم الخذلان عملية مشتركة بين الحبيبين، مش حاجة بسيطة موجودة عند طرف والطرف التاني بيطلبها، لأ دي عملية صعبة وبتتطلب مشاركة. تكملة الأغنية بتقول "إن بوحت بالسر تصونه". لكن الحقيقي إن العشم في الحبيب الجميل مابينتهيش، ومافيش مُحب بيكتفي بصون السر بس. يمكن الحب شيء مضاد للرضا، كل ما تحب هتعوز أكتر من حبيبك، واللي بيرضيك امبارح بكره هتعوز أكتر منه، الحب ليه أحكامه بقى.

*أنتي القلب وجميع سكانه

المكان: شارع الهرم

كاتب الجملة دي ارتكب غلطة من المحرمات في الحب، استبدل كل حبايبه وكل سُكَّان قلبه، بواحدة بس! كان الله في العون.

*يا ليت لي جناحًا كي أحملك، يا ليت لي جناحًا كي أعانقك فيه إلى الأبد

المكان: شارع فيصل

مين ممكن يتمنى يملك جناح عشان يعلَّق فيه شخص تاني، بثقله وهمومه ومشاكله، غير المُحب؟ مين ممكن يمتلك جناح وبدل ما يفكَّر يطير بيه يلف العالم، تبقى أمنيته إنه يحضن بيه حبيبه للأبد، غير المُحب؟

*ضلّي أنتي العنوان.. لإنه في بعدك مالناش جيران

المكان: وسط البلد - ميدان عبد المنعم رياض  

الفرعي ماكنش يقصد بالجيران المعنى الحرفي، افتكر كام مرَّة بسبب البعد حسّيت إن صحبتك وحبايبك الموجودين مالهمش تأثير عشان تفهم قصده أحسن.

*كانت جميلة للحد الذي يمكنك فيه تأليف معزوفة موسيقية وأنت لا تعرف كيف تعزف

المكان: شارع المرور - بين السرايات 

ازاي جمال شخص بتحبه قادر يخليك تعمل حاجات مابتعرفش تعملها؟ تحاول تعملها، تحاول تنجح، لمجرد إنك بتحاول تلاقي طريقة تعبر عن جماله.