من زمان، مش من زمان أوي يعني، بس هو من زمان، كانت الناس بتغني وتعزف وترقص، بس ماكانش عندهم الجهبذ اللي قرر يغني للكورة أو يغني في الاحتفالات الرياضية. عبد الوهاب ماغناش لصعود مصر كاس العالم في إيطاليا 1934، ولا أم كلثوم احتفلت بفوز الأهلي ببطولة دوري 1948. دلوقتي لو الأهلي كسب بلدية المحلة في دور ال32 من كاس بطولة جمهورية شبين، في مطرب بيعمل أغنية يحتفل بفوز الأهلي.

بدأت ازاي الحكاية وإيه أشهر الأغاني اللي اتعملت لانتصارات رياضية؟ ده مش حصر، علشان أنت في مصر، مافيش حاجة بنعرف نحصرها هنا يا بني غير عدد السكان والديون. ده مجهود من البحث وتنشيط الذاكرة، علشان نوصل للبدايات، وما بعد البدايات، نفتكر أغاني في النص كنا ناسينها، ونستعد للأغاني الجديدة اللي هتتعمل على حس كاس العالم روسيا 2018

1- مدد (محمد نوح)

إن كان في أرضك مات شهيد في ألف غيره بيتولد. طبعًا واضح من الكلمات إنها أغنية ماينفعش تتغني لفريق كورة خالص، إلا لو كنا رايحين نلاعب إسرائيل. الأغنية غناها محمد نوح بعد نكسة 67، بس اكتسبت شهرة من نوع تاني لما غناها في الاستاد في أواخر السبعينات علشان يحمس لاعيبة منتخب مصر اللي هيواجهوا تونس في تصفيات كاس العالم، وكررها أكتر من مرة.

2- بين الأهلي والزمالك (صباح)

الاتنين حلويين الاتنين طعمين. صباح كان ليها تجربة في الستينات من قبل محمد نوح ومدد. التعصب لما زاد في الستينات بين جمهور القطبين، كتب الشاعر حسين السيد أغنية علشان يقول فيها إن الاتنين حلوين والأهلي حلو والزمالك حلو وياختي كميلة عين أمه. عبد الوهاب وافق يلحن الأغنية وغنتها صباح. من الطرايف إنها بتقول في الأغنية 27 مليون على عدد سكان مصر، يا ترى كانت الطرق بتقف ساعتها؟

3- مبروك مبروك (ياسمين الخيام)

الحاجة ياسمين الخيام كانت أول واحدة تقول على قد نيتنا ادينا، من ساعتها واحنا بناخد على قد نيتنا أهو. أغنية مبروك مبروك مبروك.. مبروك عليكم وعلينا، فضلت ملازمة المنتخب والأندية المصرية في كل إنجازاتها، ويتحط عليها شريط بيتحرك مكتوب فيه الرئيس يقدم التهنئة لمش عارف مين بمناسبة فوزه بمش عارف إيه. آخر مرة سمعت الأغنية دي أظن كانت ساعة فوز الزمالك ببطولة افريقيا سنة 2002، من بعدها ماكانتش في انتصارات كبيرة للكورة المصرية غير في 2006، ودي كانت ليها ماسورة أغاني تانية هنجيلها بعدين.

4- يا حبيبتي يا مصر (شادية)

الأغنية الوطنية الأشهر والأكثر استخدامًا في كل المناسبات وكل زمان ومكان، وطبعًا الانتصارات الرياضية كان ليها من الحب جانب في استخدام الأغنية. وساعة الثورة شغلوا الأغنية، ولما المنتخب صغد كاس العالم شغلوها، ولو حد بطنه ماسكة وربنا سهلها عليه ممكن يشغلوله الأغنية عادي. الحقيقة الأغنية تستحق تعيش سنين كتير لصوت شادية ومستواها الفني، بس ماتكرهوناش فيها يا جدعان.

5- أغاني اعتزال اللاعيبة (بيبو الله يا خطيب)

رغم إن في التمانينات والتسعينات ماكانش في أغاني بتتعمل للاحتفال بانتصارات رياضية، لكن شعبية الخطيب أجبرت أحد الموسيقين إنه يعمله غنوة في اعتزاله، اللي حضره 60 ألف بني آدم كلهم بيهتفوا "لا يا بيبو لا.. لا مالكش حق". الأغنية كلماتها "بيبو بيبو بيبو بيبو بيبو الله يا خطيب.. يا سلام يا خطيب" بس كدة. رغم كدة اتشهرت جدًا ولسه بنسمعها لما تيجي سيرة الخطيب أو حد يستضيفه.

الخطيب اتعملتله أغنية تانية أقل شهرة، بصوت المطرب عصام عبد العزيز ومعمولة كليب على أشهر لقطات وانجازات الخطيب في مشواره. في ناس تانية اتعملها أغاني وقت اعتزالها بس كانت أقل شهرة، زي أيمن منصور مثلا، واتعملت أغنية بعد كدة لهادي خشبة بصوت وائل رياض، وأغنية لسيد عبد الحفيظ بصوت المرحوم محمد عبد الوهاب.

6- كاس العالم 1997

سنة 97 مصر نظمت بطولة كاس العالم للناشئين، ومن خلال دهاليز الإنترنت والضيب ويب، قدرنا نوصل لأغنية في افتتاح ماتشات المجموعة اللي هتتلعب في إسكندرية، والأغنية والاستعراض كانوا حاجة حلوة جدًا الحقيقة

8- كاس العالم 1999

بداية تعلق المصريين بلعبة كورة اليد كان من خلال جيل التسعينات اللي عمل انجازات، ولعب بطولة 1999 اللي اتنظمت في مصر، وبما إنها اتنظمت في مصر فأكيد كان في أغاني مصري في الافتتاح. أنوشكا وهشام عباس قدموا مزيكا وعرض لسه بحب اسمعهم واتفرج عليهم لغاية النهاردة. أهلا بيك ع الأرض السمرا يا عم الحاج.

6- أغاني كاس أمم 2006 (الماسورة)

- افتتاح البطولة كان فيه أغاني حلوة ممكن للنهاردة تحب تسمعها وتتفرج على الكليبات بتاعتها. هشام عباس عمل أغنية "بطولتنا"، وسميرة سعيد غنت في حفل الافتتاح بأكتر من لغة، أغنية "إنسان". ورغم اختلاف المكان ومن البشر ألوان، دول بس الأغنيتين اللي بنشرحهملك من ماسورة أغاني 2006.

- حمادة هلال مارس هوايته المفضلة في الأغاني اللي كلماتها غريبة، وكان أول صوت نسمعه بعد بلن أبو تريكة، أغنية بتقول "والله وعملوها الرجالة ووقفوا وقفة رجالة والكل طاير م الفرحة ومصر لبسانا الطرحة" إيه ده أصلًا؟ يعني إيه؟ المشكلة إن الأغنية عاشت وفضلت ملزمانا في احتفالاتنا الرياضية لغاية دلوقتي.

- الفوز طلع بأغاني تانية لناس مانعرفهاش، حلمي عبد الباقي رجع عمل أغنية للمنتخب ونام تاني. وفي واحد تاني كدة ماعرفش مين الحقيقة عمل أغنية لكل واحد من لاعيبة المنتخب. أول معرفتي بديانا كرازون كانت أغنية عملتها للمنتخب بعد 2006، والأغنية هي هي غناها بعد كدة إيهاب توفيق بس للأهلي مش المنتخب، أو مش متأكد مين سبق التاني.

في نفس الفترة تقريبًا كان الأهلي بياكل كل اللي قدامه في كل البطولات، وده استدعى شوية أغاني كدة لإيهاب توفيق على سعد الصغير على أي حد عاوز يتشهر عمومًا. أشهرهم أغنية سعد الصغير "الأهلي في كل حتة عمال يجيب أجوال"

7- أغاني غانا 2008 (انطلاقة حسين الجسمي)

ماسألتش نفسك كيف بدأ حسين الجسمي؟ الجسمي تقريبًا بيعمل أغنية لمصر كل سبت واتنين وأربع، بس البداية كانت بعد فوز منتخب مصر ببطولة أمم أفريقيا غانا 2008، ساعتها الجسمي غنى في الحفلة اللي اتعملت للمنتخب في الإمارات، المعروفة إعلاميا بحفلة "العِلب". غنى أغنية "اسألوا كل الناس" ومن بعدها حب الموضوع أوي.

نانسي عجرم كانت في نفس الحفلة بأغنيتها "لو سألتك أنت مصري" بس دي اتعملت من قبل كدة ونجحت وعلقت مع الجمهور في مصر بشكل كبير.

8- كاس العالم للشباب (الفنان الما ورائي عمرو مصطفى)

لسه مكملين وبنجيبلكم معانا غرايب وطرايف وعجايب ونوادر كلها جديدة، بنطير نجيبهالكم من كل أنحاء الدنيا، ومش هننسى نجيبلكم البسمة، الدهشة، اللقطة النادرة ومواقف وطرائف بس من غير أستاذ جلال علام. وصلنا ل2009، وقتها مصر كانت بتستعد لاستقبال كاس العالم للشباب. جيل طلعت وعرفتو وشهاب والناس الجميلة اللي مانعرفش هي فين دلوقتي. الافتتاح غنى فيه عمرو مصطفى أغنيتين "الليلة" و "حبتها" والتانية أشهر من الأولى وعاشت شوية في ودان الناس.

9- تصفيات كاس العالم (ماسورة رقم 2)

مصر كان فاضلها خطوة وتصعد كاس العالم، وده استدعى شوية أغاني كمان، وطبعًا كلها مش هتعيش لضعف مستواها الفني، عدا يمكن أغنية لؤي "بلدنا في القلوب متشالة" من فيلم "العالمي" بطولة الفنان شابوه يوسف الشريف.

الفترة دي كمان كان فيها ما عرف بأغاني الجزائر. لما الفتنة اشتعلت بين مصر والجزاير بسبب ماتش كورة، طلعت شوية أغاني لا محل لها من الإعراب كدة علشان تشتم الجزاير وتهتف لمصر، أشهرها كانت أغنية راب لأحمد مكي اللي كان بيحقق أرقام ممتازة بأفلامه في شباك التذاكر، بس في نفس الوقت كان أبوه جزائري وأمه مصرية، فكان بيتسأل كتير على اللي بيحصل، لحد ما قال مابدهاش بقى، هرزعهم أغنية تهز الجزائر وفرنسا والمغرب بالمرة.

كان في أغنية تانية راب مجهولة الهوية، كانت على كل موبايلات النوكيا والناس بتتناقلها بالبلوتوث كأنها مخدرات. الفترة دي الواحد بيحاول يتنساها ويتناسى كم الجهل والخبل اللي كان طافح في كل مكان.

10- أغاني ال"معلش" بعد فشل التأهل لكاس العالم

ماصعدناش كاس، وفضلنا فترة مقتنعين إن الجزاير سرقت الفوز بطرق غير شريفة، فيلا نعمل أغاني وحشة وبرضه ومستواها الفني وحش بس "بتمعلشنا" شوية. كمان بعدها بكام شهر كسبنا بطولة الأمم الأفريقية التالتة على التوالي، فنعمل شوية أغاني كمان، -لسه وحشة- علشان المناسبة. ودنك ممكن ماتفتكرش من أغاني الفترة دي غير "ولا أي كلام" بتاعت حماقي، وهي أفضل الوحشين.

تامر حسني دخل كمان في الليلة وعمل "بحبك يا مصر"، حمادة هلال عمل مبروك علينا بينقط فيها لاعيبة المنتخب. ورامي صبري عمل أغنية هو نفسه مش هيفتكر اسمها. طبعًا فنانين الشعبي والمهرجانات لم يتوقفوا يومًا وشغالين أغاني مع نفسهم، كلها تسقط من الذاكرة.

الأغاني قلت كتير بسبب ابتعادنا عن المنافسات، مش عارف ميزة ولا عيب. عمومًا الأغاني اللي اتعملت لمناسباتنا الرياضية كانت وليدة اللحظة في معظمها، حاجة كدة تصبيرة هتتغنى يومين وتموت. بس لسبب ما الناس اللي بتشغل "والله وعملوها الرجالة ووقفوا وقفة رجالة" عيب والله يا رجالة.

صورة الموضوع للمصور: علي فهيم