السينما المصرية بقالها 100 سنة وشوية، اتعمل خلالها جميع الأنواع من الأفلام: دراما، رومانسي، وكوميدى.. إلخ. أفلام الخيال العلمي مش من النوعيات الأفلام اللي اتعملت كتير في السينما المصرية، ده غالبًا راجع إنه مافيش علم في مصر. القايمة دي فيها محاولات بعض صناع السينما المصرية إنهم يعملوا أفلام خيال علمي، معظم الأفلام فلتت منهم، بس في أفلام مش بطالة برضه وأفلام تانية.. ما تيجي نشوف.

رحلة إلى القمر (1959):

أول قدم لمست القمر ماكانتش قدم "نيل أرمسترونج" لأ، كانت قدم إسماعيل يس. أه والله. فيلم الخيال العلمي المصري  "رحلة إلى القمر" بيرصد أول رحلة قامت بيها البشرية للقمر واللي قام بيها إسماعيل يس ورشدي أباظة  وواحد تالت كدة. الفيلم عبارة عن إسماعيل يس بيقول نكت على بقه جوّه سفينة فضائية وبعدين فوق سطح القمر, وتقريبًا مشاهد القمر كانت متصورة فوق جبل المقطم.

مشهد مميز:

في مشهد شهير فيلم Gravity وجورج كلوني بيشد ساندرا بولوك بحبل وهي  بتفقد توازنها في الفضاء. المشهد ده موجود بالحرف, مش بالحرف قوي يعني, في الفيلم هنا. الريادة دايمًا مصرية.

المليونير المزيف (1968):

فؤاد المهندس بيلعب دور "حمدي" المخترع اللي بيضيع كل فلوسه على الاختراعات الفاشلة بتاعته، فبيعمل نفسه ميت وبيرجع على إنه أخوه اللي كان عايش في المكسيك. جانب الخيال العلمي فى الفيلم كان متمثل في الروبوت بتاع حمدي اللي اسمه "مكمك" واللي كل مشكلته إنه عايز يتجوز. الروبوت كان عبارة عن الفنان "حسن مصطفي" جوّه علبة كرتون بتنور.

مشهد مميز:

"حمدى بيوعد "مكمك" إنه هيعمله روبوت "حرمة" شبه "صوفيا لورين" لكن "مكمك" بيقوله إنه عايز الروبوت شبه "شويكار". إفيه لطيف.

المجانين التلاتة (1969):

 الفيلم المعروف بجملة "زود الفولت, قلل الفولت". سمير غانم دكتور بيطري فاشل اسمه الدكتور توفيق، بيقرر يبقى مخترع و بينجح إنه يعمل جهاز بيصغر ويكبر الكائنات في العمر, بيعمل تجربة على الضيف أحمد وبيخلى عنده 180 سنة ومابيعرفش يرجعه صغير تاني! حاجة ده في التهييس, الفيلم أصلًا تلت أربعه أغاني لثلاثي أضواء المسرح. نجلاء فتحي طالعة مخطوبة للضيف أحمد وبتحبه, دي تقريبًا أكتر حاجة خيال علمي في الفيلم.

مشهد مميز:

الدكتور توفيق بيحط عروسة لعبة في الجهاز بتاعه علشان تطلع من الجهاز الراقصة "سهير زكي" و بتقدم وصلة رقص مميزة الصراحة.

مملكة الحب (1973):

حسين فهمى وعادل أدهم وواحد تالت بدقن كدة بيركبوا آلة الزمن علشان يسافروا المستقبل، لكن بيحصل خطأ وبيسافروا الماضي علشان يلاقوا نفسهم على قارة "أطلنتس" قبل ما تتفقد. صناع الفيلم كانوا قاصدين يعملوا فيلم جد مش هلس والنتيجة كانت مسخرة. عمومًا هو الفيلم عذر علشان نشوف مشاهد ساخنة بين حسين فهمى وناهد يسري اللي كانت بتلعب دور ملكة "أطلنتس".

مشهد مميز:

جميع مشاهد حسين فهمى وناهد يسري على السرير تستحق المشاهدة للناس اللي حالتهم صعبة.

جري الوحوش (1987):

تقريبًا الفيلم الأجود فنيًا في القايمة. هو مش فيلم خيال علمي صريح، بس حبكة الفيلم معتمدة على تجربة علمية مش واقعية علشان كده ينطبق عليه وصف خيال علمي. عالم مصري بينقل جزء من مخ راجل عنده القدرة على الإنجاب لراجل ماعندوش القدرة, العملية بتنجح على المستوى النظري، لكنها بتدمر حياة كل من شارك فيها. الفيلم مميز بالمناظرات بين العالم العقلانى المؤمن فقط بالعلم اللي لعبه "حسين فهمي" والمحامى المتدين المؤمن بالقدر اللي لعبه "حسين الشربيني".

مشهد مميز:

"القرد لسه بيتنطط ولا بطل تنطيط". 

الرقص مع الشيطان (1993):

دكتور "واصل" بيكتشف زهرتين غريبتين في قريته وبيعمل عليهم تجارب بتمكنه إنه يسافر للماضي والمستقبل, ومع الوقت بيبدأ يفقد عقله. الفيلم كان فيه كلب أسود كل شوية بيظهر وهو بيجرى أو بيهوهو بدون داع كدة, غالبًا وجوده كان الغرض منه إضفاء جو من الرعب على أحداث الفيلم. "نور الشريف" وصل لأعلى درجات "الأوفر آكتينج" في الفيلم ده، خصوصًا في المشاهد اللي بيجنن فيها وبيقعد يلف حوالين نفسه زي بتوع التنورة.

مشهد مميز:

غير الكلب فيه غراب كيوت ظهر وهو بينوح في مشهد برضه.

سمير وشهير وبهير (2010)

أكيد مش هانفكر حد بقصة الفيلم ده لأنه بيتعاد على الفضائيات ليل نهار ومعظم الناس حافظينه، ممكن يتقال عليه مستريح أكتر فيلم مضحك في آخر عشر سنين. السفر عبر الزمن هنا كان الغرض منه السف على الفرق بين العيشة في السبعينات والعيشة دلوقتي.

مشهد مميز:

هو الفيلم مليان بس مشهد الحفلة بتاعة "منير الخطير" على المستوى الشخصي بيقتلني ضحك.