"المرض الوحش" ده اللي بيقوله المصريين عن مرض السرطان عشان يتجنبوا يجيبوا سيرته من كتر ما بيخافوا منه، وبيعانوا في رحلة العلاج، وخصوصا لو ساكنين بعيد عن القاهرة عشان مفيش مراكز للعلاج والفحص، ومحتاجين خدمات علاجية متخصصة مش متوفره في الصعيد و بالأخص في شمال الصعيد، وعشان كدة مؤسسة مصر الخير بتدعم مركز أورام الفيوم عن طريق توفير أول جهاز إشعاعي في شمال الصعيد والمتمثل في محافظات الفيوم وبني سويف والمنيا عشان يكون جاهز لاستقبال المرضى ويوفر عليهم مشقة السفر و الإنتقال اللي بتبقي مجهدة صحيا و ماديا.

أغلب المصابين بالسرطان في محافظات شمال الصعيد بيحتاجوا علاج إشعاعي لكن المشكلة إن مفيش غير ٧٠ جهاز على مستوى الجمهورية كلها، واحتياج المرضى اكتر من ١٦٠ جهاز وعشان كده في المرحلة الأولى لدعم مركز الأورام في الفيوم قدرت مؤسسة مصر الخير توفر وحدة الجهاز الإشعاعي إللى إتكلفت أكتر من 35 مليون جنيه، الوحدة دي هتعالج كل يوم ٨٠ مريض بحد أقصى، مع العلم إن المريض بيحتاج في المتوسط ما بين 30 – 60 جلسة، وده هيساهم في علاج أكبر عدد من المرضى يوميًا. الوحدة هيتم تجيهزها عشان تبدأ تشتغل بداية السنة الجاية.

في المرحلة التانية لدعم مركز أورام الفيوم، مصر الخير بتضمن التكفل بعلاج المرضى المحتاجين.
من فترة اتفاجئ الناس بخبر إصابة شريف مدكور بسرطان القولون، بس كمان اتفاجئنا بقوته وصلابته وقدرته على محاربة المرض ووقوفه قدامه بشجاعة، شريف كان بيظهر في حلقاته ويحكي عن تجربته ويشجع غيره من المرضى ويقول إنه قادر على هزيمته، وعشان كده قرر إنه يكون سفير حملة مصر الخير لدعم مركز أورام الفيوم ضمن حملة خليك في ضهر البطل، لأنه حاسس باللي عاشوا وعايشين تجربة السرطان وقادر يدعمهم ويقويهم ويساعدهم على تجاوز المحنة بمساعدة مصر الخير.

مؤسسة مصر الخير هدفها مش بس العلاج لكن كمان نشر الوعي الوقائي والكشف المبكر عشان الناس تبدأ رحلة العلاج بدري بدري لأن ده بيساعد على رفع نسبة الشفاء، والمؤسسة كمان بتقدم كل الدعم النفسي والمعنوي لكل اللي بيحاربوا مرض السرطان في مركز الفيوم أو في اي مكان في مصر كلها.

مركز أورام الفيوم كمان هيقدم خدمات مختلفة من خلال العيادات الخارجية، ووحدة الكشف المبكر عن الأورام، ووحدة العلاج الكيماوي، وطبعا هيكون فيه وحدة للتثقيف الصحي والتعليم وهيتم إقامة ندوات للتوعية الصحية ومؤتمرات.

وعلشان كدة لازم كلنا نكون فى ضهر البطل محارب السرطان، وتتبرع من خلال اللينك