"بسبب الإنترنت العالم أصبح قرية صغيرة" دي أول جملة سمعتها في حصة الحاسب الآلي في المدرسة، وده الاعتقاد اللي فضل في دماغي، إن العالم كله بقى على تواصل وكلنا عارفين بعض والدنيا بقت أوضة وصالة، من غير ما أفكر في إن -بالرغم من إن عدد مستخدمي الإنترنت في العالم حوالي 3 مليار شخص- لكن بالنسبة لناس كتير وجود الإنترنت رفاهية وميزة مش موجودة عند كل الناس.

تيمور صبري، محمود السعيد وسراج مينيسي، 3 شباب قرروا يأسسوا "متصفح وصلة"، أول متصفح للإنترنت في مصر بعد 3 سنين من الدراسة والتخطيط، وسنة ونص من الخطوات الفعلية في إنشاء المتصفح، قابلنا "سراج" وحكالنا عن "وصلة"، "فكرة وصلة قايمة على هدف محدد وهو إننا ندي إنترنت ببلاش لـ 500 مليون شخص حوالين العالم في الأسواق الفقيرة ومش سهل بالنسبالهم توفر الإنترنت زي مصر، إثيوبيا، نيجيريا، البرازيل.. حاولنا نسهل العملية ونبدأ من مصر.. ليه فكرنا نعمل كده؟"

التليفزيون ببلاش.. ليه الإنترنت مايبقاش زيّه؟ 

بيطرح "سراج" السؤال وبيجاوب عليه: "أخدنا مثال التليفزيون وكنا عايزين نطبقه على إنترنت الموبايل، واللي زوّد الدافع عندنا إن فيه حوالي 40 مليون مصري بيستخدموا Smart Phones، ونسبة استخدام الإنترنت في مصر بتزيد يوميًا"، بيكمل: "الإنترنت المفروض يبقى في إيد كل واحد، هو مش رفاهية بتميز واحد عن التاني، عشان كده قررنا نستهدف شريحة معينة من المجتمع المصري وهما المستخدمين اللي دخلهم أقل من 8000 آلاف جنيه في الشهر –بيمثلوا حوالي 50 مليون مصري من المجتمع المصري-  وكمان بنستهدف فئة عمرية بتتراوح من عمر 13 لـ 35 سنة".

في إحصائية لوزارة الاتصالات بتكشف فيها عدد مستخدمي الإنترنت في مصر في 2018، وصل عدد مستخدمين الإنترنت على الهاتف المحمول لـ 32 مليون مستخدم.

إطلاق أبليكيشن "وصلة" كان من 3 أسابيع تقريبًا وحقق لحد النهاردة 12 ألف مرة تحميل، و5 آلاف مستخدم نشط يوميًا على المتصفح، و4 آلاف مستخدم سجلوا عليه بس لسه ماستخدموش المتصفح بشكل فعلي.

إيه مميزات متصفح "وصلة" عن أي متصفح غيره؟ 

فريق عمل "وصلة" كانوا عايزين يخرجوا من الصور النمطية اللي متاخدة عن شكل وآلية عمل أي متصفح إنترنت، وقرروا إنه لازم يخدم المستخدم بأسهل شكل ممكن. "بمجرد ما المستخدم بينزّل "وصلة" بيسجل بياناته وبما إنها أول مرة فـ بيجيله 5 جنيه رصيد، بيستخدم بيهم المتصفح وبيدخل على أي موقع هو بيدور عليه، وفي رحلة التصفح دي المستخدم بيبقى بيجمع نقط بشكل فعلي، وبعد ما يجمع 15 ألف نقطة يقدر يحولهم لرصيد أو ميجات إنترنت–على حسب اختياره أو احتياجه-". بيشرحلنا "سراج"، ومن الحاجات اللي بيوضحهالنا إن لو المستهلك قعد 20 دقيقة على "وصلة" هيرجعله حوالي 40% من اللي استهلكه.

زي أي شركة ناشئة بتبدأ بيقابلها مخاوف وعقبات ومطبات وأول مطب قابل "وصلة" هي ردود أفعال اللي حواليهم، بيوضجلنا "سراج": "إنك تبني حاجة لأول مرة دي حاجة مش سهلة، الناس كانوا بيقولوا علينا مجانين وإننا هنفشل أكيد سواء من التقنيين لشركات الاتصالات لشركات الإعلانات، دلوقتي هما بيقدمولنا الدعم اللي محتاجينه، بس في الأول ده ماكنش سهل ولا حد مقتنع بيه وبينا".  

الحماية والخصوصية في متصفح "وصلة"

من الوساوس والمخاوف اللي بقى بيفكر فيها أي مستخدم للإنترنت حاليًا هي حماية معلوماته، اللي معرضة في أي وقت وبشكل أو آخر للاختراق. فـ من أهم الحاجات اللي فريق عمل وصلة اهتموا بيها هي الحفاظ على خصوصية المستخدم، بيشرحلنا "سراج": "المستخدم في "وصلة" بيسجل اسمه ورقم تليفونه والاهتمامات اللي بيدور عليها وده كل اللي بيوصل لـ "وصلة" وبيبقى مخفي تمامًا حتى عننا ومش مسموح لنا نطلع على معلومات المستخدم، وطبعًا اللي بيدور عليه أو بيشوفه المستخدم على المتصفح أو الـ  Historyبتاعه ده مخفي وله كامل الخصوصية".

الأهم من الشغل تظبيط الشغل 

فريق عمل "وصلة" مهتمين بالتواصل المباشر مع المستخدم وشايفين إن المتصفح ده اتعمل عشان المستخدم، وبالتالي سهولة التواصل معاه كانت حاجة قدام عينيهم طول الوقت، بيقولنا "سراج": "أهم حاجة في شركة لسه بتبدأ هو التواصل مع العميل يكون أسهل حاجة في العالم، حاولنا نبعد عن استخدام الإيميلات وخدمة العملاء، وقررنا إن تواصل المستخدم معانا يبقى بشكل مباشر وسلس، فـ هو هيلاقي قسم موجود على "وصلة" عشان يبدأ محادثة أو شات يقولنا فيه مشكلته أو يسجلنا ملاحظاته ونحاول نتواصل معاه بأسرع وقت ممكن" بيكمل: "المنتج اللي بنقدمه ممكن يبقى صعب شوية ونتيجة ده احنا بنبقى محتاجين ردود أفعال وتقييمات من المستخدمين، وطول ما فيه بينا وبينهم لغة تواصل مباشرة هنتقدم بصورة أسرع، أكيد مش هنبقى قافلين المكتب علينا ومش عارفين الخطوة الجاية هتبقى إيه؟"

كل يوم بيبقى فيه حوالي ألف رسالة بين مؤسسين وصلة والمستخدمين، ومن المواقف اللي بتبين أهمية سهولة التواصل وبيقولهالنا "سراج": "في يوم واحد لقينا 2500 داونلود للمتصفح بشكل مفاجئ ويخض.. حسينا إننا بنتهكر وماكناش عارفين نعمل إيه، في الفترة دي أول حاجة قدرنا نعملها كمؤسسين للمتصفح إننا نتواصل مع العملاء ونعرف هما عرفونا إزاي ولو عندهم مشاكل نحلها وكلمنا يومها حوالي 100 مستخدم".

أحلامهم البسيطة 

الحماس اللي بدأ بيه فريق عمل "وصلة" وعدد المستخدمين اللي بيزيد يوميًا بيديهم الدافع إنهم يفكروا لقدام، بيحكيلنا "سراج": "لما بدأنا كنا عايزين نوصل لـ 100 ألف مستخدم في 2019، بس لما لقينا شكل ونسبة التفاعل بتزيد قررنا نرفع سقف طموحاتنا لـ 500 ألف مستخدم في 2019، والهدف البعيد اللي بنطمح له إننا نتجه بـ "وصلة" للدول النامية في  إفريقيا زي إثيوبيا، نيجيريا.. إلخ.. دول شعوبها جعانين للإنترنت ومش قادرين يوصلوله، واحنا عايزين يبقالنا سبب وإيد في توفيره ليهم بسهولة".  

خلال شهرين "وصلة" هيكون موجود على الويب، كـ Extension في جوجل كروم.

تقدر تحمل المتصفح من هنا
وتزور صفحتهم على الفيسبوك من هنا