في أغلب النقاشات اللي بتدور في المجتمع، الكلام عن المثلية الجنسية في العموم ده أمر مش طبيعي ومرفوض، على الجانب التاني بيحاول العلماء كل يوم إثبات المثلية الجنسية في الحيوانات أمر فطري طبيعي وسائد في المملكة الحيوانية، ومالوش علاقة بالتكاثر أو التناسل قد ما هي حاجة غريزية في الحيوانات. 

مقالات وأبحاث كتير حاولت تبني الموضوع لمناقشته ودراسته وأغلب الموضوعات كانت بتحمل في عناوينها سؤال واضح:

هل فيه مثلية جنسية في الحيوانات؟ 

في مقال اتنشر على موقع Zoo portraits بيتكلم عن السلوك المثلي للحيوانات، وبيدِّي مثال على ده بدراسة أجراها عالم الحيوانات Konrad Lorenz على 1500 نوع حيوان، لقى إن 450 نوع منهم على الأقل حصل بينهم جماع جنسي أو روابط عاطفية. بعد 10 سنين أكدت الدراسة دي دكتورة Nathan Bailey في جامعة كاليفورنيا، وقالت إن السلوك الجنسي بين الأفراد من نفس الجنس ممكن تشوفه في كل أنواع المملكة الحيوانية.

دكتور محمود حمدي –أخصائي طب وجراحة الحيوان- بيجاوبنا على السؤال بإن فيه مثلية جنسية في أغلب الحيوانات، وادانا مثال "القطط والكلاب"، وإن المثلية بتحصل بينهم في حالة سيطرة الطرف الأقوى على الطرف الأضعف أو الأصغر سنًا، والرغبة العالية عند الحيوانات بتخليهم يمارسوا الجنس مع أي حد أو حاجة قدامهم، "الحيوان سواء قط أو كلب بيتجوز على نفسه، وبيعمل ده مع المخدة أو البطانية أو أخوه الصغير أو ممكن يتمسَّح في الإنسان اللي بيربيه بدون ما يبقى واعي إن ده بني آدم فتلاقيه بيتمسح بشكل غريب في الإيد أو الرجل ومابتبقاش علاقة كاملة بالتأكيد، كل اللي بيفكر فيه إنه محتاج حاجة تهدّي الرغبة اللي عنده".

دكتور محمود بيقابل كل يوم حالات بتعاني من ازدياد الرغبة الجنسية وبينصح بعملية "التعقيم" كحل نهائي وعملي، وهي العملية الأكثر انتشارًا حاليًا في كل العيادات البيطرية وملاجئ الحيوانات وجمعيات الرفق بالحيوان، بيتم فيها استئصال الخصيتين وترك العضو الذكري، بهدف القضاء على الرغبة الجنسية تمامًا، "بيجيلنا أصحاب حيوانات بننصحهم بإجراء العملية بسبب فوائدها، من أهمها: تحسين صحة الحيوان، وتجنب إنه يصاب بالاكتئاب، ويعيش فترة أطول"، بيكمل: "بدل ما يكون قتل الحيوانات هو الحل بسبب تكاثره بكثرة أو إصابته بالسُعار مثلًا، بننصح بإجراء العملية ومنها بنحافظ على حياة الحيوان وصحته".

المهدئات بتساعد في إخماد الرغبة الجنسية للحيوانات بس نتايجها مش مضمونة، ولو جابت نتيجة بيبقى ليها آثار جانبية وفي الغالب مابينصحش بيها الأطباء البيطريين. حتى في الحالات النادرة في القطط والكلاب اللي بيكون عندهم العضوين في جسم واحد، بيبقى حيوان بيملك (عضو ذكري وعضو تناسلي) والهرمون المسيطر والأكثر نضجًا هو اللي بيحدد الاتجاه الجنسي للحيوان، وبيأكد إن دي حالات نادرة.

1500 نوع مختلف من الحيوانات بيمارس المثلية الجنسية

حوالي 1500 نوع حيوان بيمارس الجنس مع نفس النوع، من الأسماك للحشرات للطيور للثدييات، عشان كده المثلية في الحيوانات أمر منتشر، مش حاجة غريبة أو  نادرة الحدوث.

الدراسات اللي اتعملت على الأنواع المختلفة من الحيوانات، راقبت أنشطة جنسية لحيوانات محددة بعينها، وحطّت كل تركيزها على مراقبة العملية الجنسية، من أهم الحيوانات اللي لُوحظ عليها سلوك أو ميول مثلية:

الزراف: ممارسة المثلية الجنسية في النوع الواحد من الزراف متواجد بنسبة 90% من النشاط الجنسي عمومًا.

الأسود:
في الغالب بيتم تكوين تحالف مكون من 2 لـ 4 أسود ذكور وبيمارسوا المثلية الجنسية مع بعض، بهدف صد أي ائتلافات تانية ولإثبات الولاء وتقوية روابطهم ببعض.

قرود المكاك:
الإناث والذكور بيمارسوا الجنس مع نفس النوع، لكن الذكور في الغالب بتعمل ده لـ ليلة واحدة بس، أما الإناث فـ بتشكل روابط قوية مع بعضهم والسلوك المثلي بين الإناث مش بس أمر منتشر، لكن كمان دي القاعدة الأساسية!  وفي أوقات عدم التزاوج أو التناسل بيفضلوا قريبين من بعض وبيدافعوا عن بعض ضد أي عدو.

وفي دراسات أثبتت إن قرود المكاك مزدوجة الجنسية " bisexual"، وتقدر تمارس الجنس مع النوع الآخر أو نفس النوع في نفس الوقت، لو تم تخييرها بين واحد منهم، هتختار المثلية الجنسية.

أما قرود البونوبو، أقرب الأحياء للبشر بسبب عدم ترددهم في مساعدة بعض والدور الاجتماعي اللي بتلعبه. "البونوبو" أكتر الحيوانات اللي بتمارس المثلية الجنسية عمومًا، وبـ يكونوا في بحث دائم عن المتعة الجنسية، عشان كده بتحصل روابط بينهم وبين بعض لممارسة المثلية بهدف زيادة التواصل بينهم وحل النزاعات، وحوالي ثلثي الأنشطة المثلية الجنسية بتحصل بين الإناث.

الأغنام/الخِراف:
الدراسات بتشير إلى إن فيه 8% من الذكور الأغنام بيفضَّلوا نفس الجنس، وأثبتت الدراسات إن النوع ده من الأغنام بيبقى ليها بنية دماغية مختلفة عن بقية الأغنام، وبتطلق هرمونات جنسية أقل.

أما بالنسبة للطيور، فـ حوالي 10-15% من بين مجموع زيجات طائر النورس بتبقى مثلية، وناجحة.

براءة الأطفال في عينيه

على الرغم من البراءة اللي بتتمتع بيها الدلافين، لكن في الأصل هي حيوانات عنيفة وبتميل لاغتصاب الأنثى. فصيلة "بوتلنوز" من الدلافين، بتبقى مزدوجة الجنسية معظم حياتها، وبتبدأ السلوك المثلي من عمر سنة لعشرة، ولما بتوصل للسن العاشر بتشكل أزواج مع شريك من نفس الجنس.

المثلية الجنسية في الحيوانات من منظور الشريعة

لحد دلوقتي مافيش أي رأي واضح من الفقهاء أو العلماء عن المثلية الجنسية، بس اللي موجود على النت فتوى على موقع إسلام ويب، عن موقف الإسلام من المثلية الجنسية في الحيوانات، وهي إن مافيش تكليف على الحيوانات ولا عقل ليها، وإن فطرة الحيوانات متدنية عن فطرة الإنسان وماتتقارنش بيها، وبالتالي، أفعالها ماتتوصفش لا بقبح ولا حُسن ولا معصية ولا ذنب.

المصادر:

1500 نوع من الحيوانات بيمارس المثلية الجنسية 
أنواع الحيوانات المعروفة بالسلوك المثلي 
المثلية الجنسية في قرود البونوبو 
المثلية الجنسية في الحيوانات من منظور الشريعة