لما كنا شغالين على تحقيق ورش صناعة المانيكان، سافرنا قرية اسمها "الخرقانية" في محافظة القليوبية، كنا مستغربين من الاسم، وعندنا فضول نعرف ليه فيه قرية ممكن تتسمى بالاسم ده؟ ومين المسؤول عن تسمية القرى المصرية؟ للأسف مافيش أي معلومة واضحة أو مصدر أو قانون نعرف منه مين المسؤول، بس الأكيد إن لو حصل جدل حوالين اسم قرية محتاج تغيير اسمها، بتكون مهمة المحافظ وبيصدر قرار بتغييره. 

في 2016، الجهاز المركزي للتعبئة والإحصاء أصدر تقرير "لأول مرة" عن أوضاع البنية التحتية والخدمات في 4655 قرية، اللي هو عدد القرى في مصر، وكان تقرير مفصل عن أوضاع الريف المصري، سواء بالنسبة لوسائل النقل والطرق والصرف الصحي وخدمات الغاز والاتصالات والتعليم الثانوي، ونتج عن المسح ده إن 82% من القرى مافيهاش مدارس ثانوي، و60% من القرى محتاجة إنشاء مدارس، و74.3% من القرى مفيهاش صرف صحي، و75% مفيهاش سنترال حكومي، إلخ... تقدر تشوف التقرير بالكامل من هنا.

السؤال بقى: لما سكان قرى مصر بيعانوا من كل ده، ازاي بتزيد عليهم المعاناة في إنهم بيتحملوا الأسامي الغريبة للقرى والمراكز اللي عايشين فيها؟

أغلب القرى اللي أسمائها محرجة، أهاليها طالبوا بتغييرها، وبالفعل فيه اللي تم تغييرها، وفيه اللي لسه ماحصلش فيه تغيير. من القرى اللي تم تغيير اسمها، ويمكن هي أشهرهم، قرية "ميت البز" اللي اتحولت لـ قرية "ميت النور" بعد الجدل اللي كان حواليها من فترة، بس المفارقة المضحكة بتحصل لما تعرف إن اسم المركز اللي تابعة لِيه نفس القرية كان"ذو الفتى"، واتحول لمركز "زفتى".

من القرى اللي تم تغيير اسمها، قرية تبعد عن محافظة قنا بحوالي 5 كيلو، كان اسمها "البلاص". القرية كانت وما زالت تعتبر أساس صناعة الآواني الفخارية في محافظة قنا، والأصل إن اسمها كان "أنجلاس" بالفرعونية، ومع الوقت اتحوّل اسم القرية من "انجلاس" لـ"البلاص". الأهالي كانوا بيطالبوا بتغيير اسم القرية أكتر من مرة، وده بيحصل من أيام عهد جمال عبد الناصر، كانوا بيبعتوا برقيات لجمال عبد الناصر، واستجاب لهم وقرر تغيير اسم القرية لـ "المحروسة". قرى تانية تم تغيير اسمها زي قرية بني كلب في محافظة الأقصر اللي اتحولت لـ "بني مجد"، وقرية "الكعبيش" في محافظة الجيزة، اللي أهلها مايعرفوش سبب تسميتها لحد دلوقتي، بس اعتراض أهل القرية على الاسم خلاها تتحول لـ "أحمد زويل" على اسم العالم الكبير.

في نفس الوقت، فيه قرى مالهاش حظ في تغيير اسمها لحد دلوقتي، زي قرية "الخرقانية" في محافظة القليوبية، ودي اتقال عن سبب تسميتها، إن اسمها في الأصل كان "الخاقانية" في عهد الفاطميين، وكانت بالنسبالهم "متنزه"، بس اتحولت لـ "الخرقانية"، ولحد دلوقتي لسه بيطالب أهاليها بتغيير الاسم، وقرية زي "الميمون" التابعة لمحافظة بني سويف اللي بتعتبر أكبر قرية على مستوى الجمهورية من حيث المساحة، وعدد السكان حوالي 120 ألف نسمة. 

لما حاولنا نعرف أكتر عن سبب تسمية القرى، قابلنا أهالي من القرى وحكولنا:

قرية أبو قراميط:
تابعة لمركز السنبلاوين، محافظة الدقهلية، بيرجع سبب تسميتها لتاجر كان موجود في القرية، وكان معروف عنه براعته في صيد السمك والقراميط، وقعد فترة طويلة في القرية، بيبني فيها بيوت لحد ما اتكونت القرية.

قرية برقاش:
في محافظة الجيزة، وأهلها بيقولوا "برقاش" يعني "سوق الجمال"، وهي فعلًا بتشتهر ببيع الجمال في سوق على مساحة 25 فدان.

قرية حنون:
التابعة لمركز زفتى، محافظة الغربية، اتقال إن فيه أسباب كتير لتسمية القرية، بس السبب اللي منتشر أكتر، إنه كان اسم ست كانت بتداري الفدائيين أيام الحرب، والسادات اتكلم عنها في سيرته الذاتية، لما كان مطلوب القبض عليه، فـ عدى على القرية واستخبى فيها.

قرية محلة مرحوم:
في محافظة الغربية، التسمية في الأساس كانت لـملك فرعوني اسمه "حوم"، ودي كانت طريقة الوصول للدلتا، فـ اتسمت بـ محل مرور حوم، لحد ما وصلت لـ "محلة مرحوم".

في 2014 نشرت جريدة الأهرام جزء من موسوعة "بلدان مصر" للباحث والمؤرخ الاجتماعي "جمال مشعل"، بيتكلم فيها عن أسرار القرى المصرية وأصول مسمياتها، ومن ضمن اللي اتنشر من الموسوعة، إن 83 قرية في 16 محافظة، أصل أسمائهم بيرجع لأسامي القبائل والعائلات اللي عاشوا في القرى دي، زي بني طالب، وبني مطير في مركز الفتح، و40 قرية في 12 محافظة على أسماء العُمد زي رواق وكحك وزيد، و51 قرية في 16 محافظة على أسماء المشايخ وأولياء الله الصالحين، و28 قرية بيرجع أصل المسمى بتاعها لأصحاب القرى ومؤسسيها.

قرية أبيانة:
اللي تابعة لمركز مطوبس محافظة كفر الشيخ، اتقال إن سبب تسميتها إنها كانت متغطية بالمياه بالكامل، وبانت.. فـ اتسمت بـ "أبيانة"

قرية "نكلا":
سبب تسميتها للعملة "نكلة"، وقرية "جزاية" كان فيها حفظة قرآن كتير، فـ قرروا تسميتها بـ جزء وآية، فـ خلوها "جزاية"

قرية نمرة البصل:
التابعة لمركز المحلة الكبرى في محافظة الغربية، واتسمت بالاسم ده عشان تربتها كانت ملائمة جدًا وخصبة لزراعة البصل حتى إن بيتم تصدير البصل منها.

فيه قرى مصرية تمت تسميتها على أجزاء جسم الإنسان، زي قرية "الوسطاني" في مركز كفر البطيخ، نسبة لوسط الإنسان، وقرية "الضهرة" في مركز فارسكور، نسبة لضهر الإنسان، وقرى تمت تسميتها على حسب المهنة اللي منتشرة في القرية زي قرية "الخياطة" في مركز دمياط، وقرية "الطرحة" التابعة لمركز فارسكور، وتمت تسميتها بسبب "طرح شِباك" الصيادين، وكلهم في محافظة دمياط. 

عزبة جهنم:
التابعة لمحافظة الأقصر، وسبب تسميتها إنها كانت عبارة عن أرض صحراوية، ولما بدأ يدخلها العمار، تم تكليف العمال بالبُنا، ماكانوش بيلاقوا ميَّة وبيروحوا للقرى اللي جنبهم، فبيتسألوا منين بتيجوا؟ بيقولوا "من جهنم"

مركز ديرب نجم:
وده واحد من مراكز محافظة الشرقية، وسبب تسميتها كان نسبة لـ نجم الدين الأيوبي، أبو "صلاح الدين الأيوبي"، اللي عسكر بجنوده في المنطقة دي وقت الحروب الصليبية، وقتها قدم أهل البلد كل المساعدات للجيش، واتسمت بعدها بـ"ديار بني نجم". 

قرية كوم الحنش:
ودي في محافظة البحيرة، وأهلها بيرجحوا سبب تسميتها لوجود "حنش" كبير كان بيخرج من ورا كوم عالي موجود في القرية. 

فيه قرى ماعرفناش نوصل لسبب تسميتها، زي قرية "الخرمان" التابعة لمركز أطفيح في محافظة الجيزة، وقرية "طناش" في منطقة إمبابة، قرى زي "رقية الشغب" و"المراعزة" و"الشباشبة" التابعين لمركز أرمنت في محافظة الأقصر، وقرية الجرنوس في مركز بني مزار في محافظة المنيا، وقرية الزنقور في مركز جرجا في محافظة سوهاج، وقرية الفشخانة، وكتاكت، وسحالي في مركز أبو حمص في محافظة البحيرة، وقرية الجربوعة في مركز غزال، وقرية خمارة وشبرا النونة وضهر التمساح في مركز إيتاي البارود وقرية العرقوب في مركز كفر الدوار في نفس المحافظة، وقرى زي "شطانوف" في مركز الشطنوفي وقرية "براشيم" في مركز أشمون التابعين لمحافظة المنوفية، وزي "فلتس" و"خروعة" في محافظة الشرقية، وقرية "أبو رخم" في محافظة الإسماعيلية، وقرية "العتوة" في مركز قطور، وقرية "البدنجانية" وقرية "بقلولة" في مركز السنطة في محافظة الغربية. مركز بلقاس في محافظة الدقهلية بيضم عدد كبير من الأسامي الغريبة للقرى، زي: قلابشو، والستاموني والخازندار وبسنديلة.

لحد دلوقتي أهالي القرى دي مش عارفين سبب التسمية، وأوقات بيمشوا حسب اللي انتشر عن القرية، بس مفيش معلومات أكيدة. ومفيش قانون محدد بيحدد التسمية والتغيير.