بتسلي نفسك بإيه وأنت بتأكل؟ بتشغل حلقة من مسلسل ولا بتفتح اليوتيوب تشوف فيلم تتفرج عليه؟  لو فكرت تعمل كده هتلاقي أفلام قصيرة كتير موجودة أونلاين عربية وأجنبية، وعمرك ما سمعت عنها لأنها ماخدتش حقها في العرض الجماهيري. الأفلام دي فضلت تتعرض في المهرجانات بس وكأنها محرمة عليك تشوفها، وعشان كده في حملة عملتها شركة MAD Solutions اسمها "شورتات الأوسكار" أو MAD Shorts عشان تعرض 5 أفلام قصيرة وصلت الأوسكار، سواء المسابقة العام أو مسابقات الطلاب، عشان لأول مرة يوم الحد 29 أكتوبر الساعة 7 ونص، تقدر تشوف الأفلام دي وتستمتع بيها في السينما.

الـ5 أفلام بيجمعهم الأوسكار وأماكنهم، تقدر تسافر 5 أماكن مختلفة، صعب بل يمكن مستحيل دلوقتي تدخلها، من خلال الأفلام دي..

فيلم "عيني" للمخرج أحمد صالح – 11 دقيقة

الفيلم اللي أخد جائزة أفضل فيلم تحريك قصير في جوائز أوسكار للطلبة، بيدور في فلسطين ومستوحى من قصة حقيقية لطفلين عاشوا صدمة الحرب والاحتلال، لو ماتقدرش تسافر فلسطين المحتلة، تقدر تشوفها بعيون أطفال صغيرين من خلال الفيلم ده اللي كسب أكتر من 15 جائزة في مهرجانات سينمائية مختلفة.

فيلم السلام عليكِ يا مريم للمخرج باسل خليل – 15 دقيقة

الفيلم وصل لآخر قائمة لجائزة الأوسكار في أفضل فيلم قصير ومعروف عالميًا باسم Ave Maria. الفيلم بيدور في الضفة الغربية في فلسطين لما عربية يهود خبطت تمثال للعدرا قدام دير فيه 5 راهبات ملتزمين بالصمت كعبادة، وفي المنطقة اللي بتجمع يهود وعرب مسيحيين، بيدور الفيلم اللي كسب 7 جوايز وشارك في أكتر من 40 مهرجان منهم كان وسيدني ومالمو للسينما العربية.

 فيلم Nocturne in Black للمخرج جيمي كيروز – 23 دقيقة

الفيلم كسب الميدالية الذهبية في أوسكار الطلبة 2016، ووصل للقائمة القصيرة لجائزة الأوسكار أفضل فيلم قصير 2017، ووصل للقائمة النهائية لجوائز البافتا لأفلام الطلاب.

بيدور الفيلم في الشرق الأوسط في مكان بيسعى فيه الإرهاب إنه يقتل المزيكا والفن لكن بيفضل عازف بيانو واحد بيحارب بموسيقته أصوات الرصاص. الفيلم إنتاج لبناني، ولو أنت مش قادر تزور الأماكن اللى بيسيطر عليها الإرهاب، شوف ازاي ممكن الناس تحارب من غير سلاح.

الجفت، الواوي، الذئب والصبي  للمخرج وليد مونّس – 20 دقيقة

وصل الفيلم لقائمة الأوسكار القصيرة لأحسن فيلم قصير، وبيدور في جبل لبنان لما حاول طفلين صغيرين يسرقوا بندقية أبوهم عشان يقتلوا ذئب افتكروه تعلب عايز يأكل الفراخ، لكن الموضوع ماخلصش هنا. لو نفسك تسافر لبنان وتطلع الجبل ومش عارف، ممكن تشوف الفيلم اللي شارك في أكتر من 20 مهرجان سينمائي دولي.

فيلم بهية ومحمود للمخرج زيد أبو حمدان – 14 دقيقة

الفيلم بيدخلك جوّه الأردن في مكان شعبي بيعيش فيه 2 عواجيز متجوزين، حياة روتينية وبتعاتب الزوجة جوزها على إنه مابيتحركش ومابيسيبش البيت، لكن لما قرر يكسر الروتين ده اتقلبت حياتهم هما كمان. الفيلم إنتاج أردني أمريكي إماراتي لبناني، وكسب 8 جوائز وشارك في 30 مهرجان سينمائي.

روح الأماكن المختلفة دي وزورها  لما تحضر يوم الأحد في زاوية في مصر، أو استنى عروض الوطن العربي، اعرف تفاصيل أكتر من هنا.